Хитайда йәргә чүшүп кәткән һәрбий қатнаш айрупиланидики 40 кишиниң һәммиси өлди

Хитайниң әнхуй өлкисидә шәнбә күни йәргә чүшүп кәткән бир һәрбий қатнаш айрупиланидики 40 кишиниң һәммиси өлгән болуп, хитай дөләт рәиси ху җинтав вәқәни тәкшүрүш тоғрисида буйруқ чүшүргән.

Шинхуа ахбарат агентлиқиниң йәкшәнбә күни хәвәр қилишичә, хитай даирилири шәнбә күнки вәқәдә айрупиландики пүтүн кишиләрниң өлгәнликини елан қилған. Вәқәдин кейин хитай дөләт рәиси ху җинтав мәркизи һәрбий ишларкомитетиниң муавин рәиси го бошйоң йитәкчилик қилған тәкшүрүш гурупписидин вәқәни ениқлап чиқишни тәләп қилди. Даириләр мәтбуатларни вәқәниң тәпсилий әһвали вә өлгүчиләр һәққидә учур билән тәминләшни рәт қилған.

Шинхуа ахбарат агентлиқи һадисә йүз берип 30 саәттин кейин вәқә тоғрисида хәвәр бәрди. Америка қатарлиқ дөләтләр хитайни һәрбий паалийитини ташқий дунядин мәхпий тутуш билән әйиблимәктә.

Бирләшмә ахбарат агентлиқиниң тәкитлишичә, әнхуй өлкилик һөкүмәт даирилири вә һадисә йүз бәргән гуаңде наһийисидики даириләр вәқәгә баһа беришни рәт қилған. Хитай дөләт мудапиә министирлиқиниң баянатчиси, вәқә тоғрисида учур елан қилиш тапшуруқи алмиғанлиқини билдүрди. Вәқә йүз бәргән гуаңде наһийиси шаңхәй шәһириниң 200 клометир ғәрбий җәнубиға тоғра келиду. (Әркин)