Шәншидики қара хумданлиқтин йәнә 80 қул ишчи қутқузулди


2007-06-16
Share

Хитай бихәтәрлик даирилири җүмә күни , шәнши өлкисидин йәнә қара хумданлиқларда қуллар әмгикигә селинған йәнә 80 кишиниң қутқузулғанлиқини билдүрди.

Һазирғичә шәнши өлкисидин қутқузулған қуллар әмгикигә селинғанларниң сани 331 кишигә йәткән болуп буларниң 9 нәпири кичик балилар икән. Хенән өлкисидә қутқузулған қул ишчиларниң сани болса 271 кишигә йәткән .

Шәнши өлкилик җамаәт хәвипсизлик идарисиниң мудири ду юлинниң билдүрүшичә, шәнши өлкисидики 2500 дин артуқ қара хумданлиқ, көмүр вә төмүр канлирини тәкшүрүп чиқиш үчүн 14000 дин артуқ сақчи сәпәрвәр қилинған. Хәвәрләргә қариғанда йәрлик һөкүмәт қуллар әмгикигә селинғанларниң һәр қайси җайлардики аилилири билән алақилишиватқан болуп, һөкүмәт даирилириниң билдүрүшичә, һазирғичә 24 киши тутулған.

Кишиләрни қоллуқ әмгикигә салған қара хомданлиқ вә көмүркан игилириниң йәрлик һөкүмәт даирилири вә сақчилар билән алақиси барлиқи оттуриға чиқмақта. Савшиң йезисидики қанунсиз иш елип барған қара хумданлиқниң игиси, мәзкур йезиниң партийә секритари болған ваң доңҗиниң оғли икән. Сақчилар бу йезидики қара хумданлиқтин 31 нәпәр қул ишчини қутқузған. Сақчиларниң билдүрүшичә, бу қара хумданлиқта өткән ноябир ейида бир киши уруп өлтүрүлгән икән.

Хитайда қуллар әмгикигә селинған кишиләрниң оттуриға чиқиши 2008‏- йиллиқ олимпик тәнһәрикәт йеғиниға тәйярлиниватқан хитайниң хәлқарадики образини техиму хунукләштүридиған бир вәқә һесаблиниду. Кишилик һоқуқ тәшкилатлири вә ғәрб дөләтлири хитайни кишилик һоқуқни дәпсәндә қиливатиду дәп әйиблимәктә. Бәзи хәлқара тәшкилатлар вә ғәрб сиясәтчилири болупму хитайниң содан билән болған йеқин мунасивити түпәйлидин 2008‏- йиллиқ олимпик тәнһәрикәт йеғини байқут қилиш тәлипини оттуриға қоймақта.

Хәлқара ишчилар уюшмилири бирләшмиси техи11‏- июн күни доклат елан қилип, 2008‏- йили өткүзүлидиған бейҗиң олимпик тәнһәрикәт йеғини үчүн мәһсулат ишләпчиқириш рухсити берилгән хитай карханилирини, өсмүрләрни әмгәккә селиш вә әмгәкчиләр һоқуқини еғир дәриҗидә дәпсәндә қилиш билән әйиблигән иди.(Өмәр қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт