Xitayda bala ishchilarni ékspilatatsiye qilish mesilisi künséri jiddiyleshmekte

Düshenbe küni, merkizi xongkongdiki xitay emgek xewerliri isimlik kishilik hoquq teshkilati bir doklat élan qilip, xitayda sebiy balilarni ishlitish mesilisining künséri éghirlishiwatqanliqini bildürdi.

" Kichik qollar" dep atalghan mezkur doklatta, eger hökümet jiddiy tedbir qollanmisa, xitayda bala ishchilarni ékspilatatsiye qilish qilmishining dawamlishidighanliqi tekitlen'gen.

Doklatta éytilishiche, xitay hökümiti, ikki ay burun xitayning shenshi ölkiside otturigha chiqqan qara xumdandiki qul ishchilar setchilikidin kéyinmu, ishchilarning bolupmu bala ishchilarning éksplatatsiyisini toxtitish üchün jiddiy we keng kölemlik bir tedbir almighan.

Franisye agéntliqining xewer qilishiche, xitay emgek xewerliri teripidin élan qilin'ghan doklat, xitay hökümet xadimliri, oqutquchilar, fabrika we karxana igiliri, bala ishchilar we ularning ata-aniliri bilen élip bérilghan söhbetler asasida teyyarlan'ghan.

Xitaydiki qol ishchilar setchiliki iyun éyida otturigha chiqqan idi. Xitay da'iriliri hazirghiche qara xumdanlarda ishlitilgen 576 neper qul ishchining qutquzulghanliqini, ularning peqet 41 ining bala ishchi ikenlikini bildürgen.

Ata-anilar bolsa , yerlik hökümet da'iriliri we saqchilarning qol ishchilar mesilisini körmeslikke sélip, ularning bu mesilini tekshürüsh toghrisidiki teleplirini dawamliq ret qilip kelgenlikini bildürmekte. (Ömer qanat)