Хитай, балилар оюнчуқи ишләп чиқиридиған бәзи карханиларни тәкшүрүдиғанлиқини елан қилди

2007-08-16

Хитай даирилири сәйшәнбә күни америка қатарлиқ дөләтләрдә саламәтлик сәвәбидин йиғивелинған балилар оюнчуқлирини ишләпчиқарғучи хитай карханилирини тәкшүрүдиғанлиқини вә мәсилә байқалған карханиларни қәтий бир тәрәп қилидиғанлиқини елан қилди. Хитай сода министирлики баянатчиси ваң шинпей, пәйшәнбә күнки ахбарат елан қилиш йиғинида хитайниң балилар бихәтәрликигә алаһидә әһмийәт беридиғанлиқини әскәртип," биз експорт мәһсулатлириниң бихәтәрликигила әмәс, мәмликәт ичидики мәһсулатларниңму бихәтәрликигә һәқиқәтән әһмийәт беримиз," дәп көрсәтти.

У йәнә" биз бу вәқәләрни тәкшүримиз вә қәтий бир тәрәп қилимиз," дәйду. Лекин ваң шнпей, тәкшүрүлидиған карханилар, тәкшүрүш әһвали яки мәсилә байқалған карханиларниң қандақ бир тәрәп қилинидиғанлиқини тилға алмиди. Америка маттел балилар оюнчуқи ширкити, алдинқи күни хитайда ясалған 19 милйон данә балилар оюнчуқиниң йиғивелинидиғанлиқини елан қилип, бу оюнчуқларниң балиларниң саламәтликигә зиянлиқ маддиларда сирланғанлиқини агаһландурди.

Бу маттел ширкитиниң тунҗи қетим балилар оюнчуқини йиғивелиши әмәс. Мәзкур ширкәт буниңдин икки һәптә бурун хитайда ясалған бир йерим милйон оюнчуқни охшаш сәвәбләр түпәйлидин йиғивалған. Хитай даирилириниң хитай оюнчуқ карханилирини тәкшүрүш тоғрисидики баянати, америка вә хитай сүпәт тәкшүрүш органлири келәр айда хитай експорт мәһсулатлириниң бихәтәрлик мәсилиси үстидә сөһбәт елип бармақчи боливатқан мәзгилдә елан қилинди. Бирләшмә ахбарат агентлиқиниң хәвәр қилишичә, балилар оюнчуқлириниң бихәтәрлики мәсилиси сөһбәттики мәркизи темиларниң бири болуп қелиши мумкин. (Әркин)