Baw tong: xitay hökümiti démokratiyini yolgha qoymay turup, mewjut mesililerni hel qilalmaydu

Xitay kompartiyisining sabiq bash sékrétari jaw ziyangning katibi baw tong, jaw ziyangning ölümining bir yilliqi munasiwiti bilen élan qilghan bayanatida, xitay hökümiti démokratiyini yolgha qoymay turup, mewjut iqtisadiy we ijitma'iy mesililerni bir terep qilalmaydu dep agahlandurdi.

Roytérs agéntliqining xewer qilishiche, baw tong bayanatida, xitayda démokratik bir tüzüm qurulmay turup, xitay hökümitining xitayda otturigha chiqiwatqan chong mesililerni hel qilishi mumkin emes, dégen.

Köpchilikke melum bolghandek, 1989‏-yilidiki tyen'enmin oqughuchilar herikitini qollighanliqi üchün wezipisidin élip tashlan'ghan jaw ziyang 15 yilliq nezerbent hayatidin kéyin, ötken yili 17‏- yanwar küni qaza qilghan.

Baw tong bayanatida, weziyet mushundaq dawamlishiwerse, xitayda choqum iqtisadiy we ijitma'iy krizis yüz béridighanliqini tekitlep, xitaydiki chiriklikning asasliq sewebi bir partiyilik diktatorluq hakimiyet, dep körsetti.

Xitayda, naraziliq heriketliri kündin‏- kün'ge köpeymekte. Xewerlerge qarighanda, 2004 ‏-yili xitayda chong ‏-kichik bolup, 74000 qétim naraziliq herikiti yüz bergen.

Xitay rehberliri bolupmu, chiriklikning aldini élish üchün yéqinqi yillarda siyasiy jehettin cheklik bezi islahat élip barghan bolsimu, emma gherb usulida bir démokratiye yolgha qoyushni qet'i ret qilmaqta. (Qanat)