Chongching tégang ishchilirining namayishi basturuldi we ikki adem öldi

Chongching tégang zawutidiki ishtin boshutulghan nechche minglighan ishchilar ikki aydin béri namayish ötküziwatqan idi. Peyshenbe küni ettigen ular sheherlik hökümet binasi aldida tinch olturup naraziliq bildürgende, hökümet xadimliri teripidin mejburiy tarqaqlashturuldi. Ular kechte yene zawutning sirtidiki dölet tashyolida kéchiche olturup qarshiliq bildürdi.

Xitaydiki boshun tor bétining jüme künidiki xewiridin ashkarilinishiche, jüme küni etigen sa'et on yérimda, saqchilar yolni tosiwalghan namayishchilarni mejburiy ikki yaqqa tarqitip, qatnashni eslige keltürgen. Nöwette mingdin artuq jama'et xewpsizlik xadimliri we topilangni basturush saqchiliri yolni muhapizet qilmaqta. Emma radi'omizning igiligen melumatlirigha qarighanda, jüme küni chüshkiche neq meydanda yene nurghun kishiler bar bolup, bu namayishchilarning teshkilligüchiliri tutup kétilgenliktin, ular teshkilsiz halette qalghan.

Qanliq basturush

Chongching tégang zawutidiki xé pamililik ishchisining bildürüshiche, saqchilar etigen alte yérimdin bashlapla adem tutush we urushqa bashlighan. Netijide ikki neper yashan'ghan ayal ölüp ketken. U bu heqte mundaq deydu:

"Bügün etigen alte yérimdin bashlap saqchilar adem tutushqa bashlidi. Ular üch neper ishchilar wekilini tutup ketti. Ularning ichidiki birsi namayishlargha bir tutash qomandanliq qiliwatqan wekiller ömikining bashliqi chén yingming. Qalghan ikkisimu wekiller. Sekkiz yérimlarda ikki yüzdin artuq puqrache kiyin'gen saqchilar neq meydan'gha kilip, ishchilar qiyapitige kiriwélip ikki saqchilar mashinisini öriwetti. Arqidinla 200 din artuq topilangni basturush saqchiliri keldi. Körgenla kishini urushqa bashlidi. Méning bilishimche, hazir doxturxanigha aparghan kishilerning sani 24 ke yitidu. Ularning ichidiki ikkisi öldi. Biri yetmish yashliq yene biri 50 yashliq. Ikkilisi ayal".

Ehwaldin xewerdar pénsiyige chiqqan bir ishchimu, weqede ikki ademning ölgenlikini ispatlidi. U mundaq dédi " ular ademlerni qalaymiqan urup, tipip, ikki ademni öltürüp qoydi. Yene bir qanchilirini yarilandurdi" .

Pinsiyige chiqqan yene bir ishchining bildürüshiche, zawuttiki téléwiziye istansisi peyshenbe küni ishchilar namayish heqqide " qanunsiz yighilish, ular yolni tosighan, ishikni tosighan " dep xewer bergen.

Muxbirimiz chongching sheherlik jama'et xewpsizlik idarisigha téléfon qilip ehwal igileshke tirishqan bolsimu, qomandanliq merkizi melumat bérishni qopalliqche ret qildi.

Ishtin boshitilghan ishchilarning hoquqini qoghdash yolidiki heriketliri

Mezkur chongching tégang (alahide xilliq) polat- tömür zawuti islahat élip bérishtin burun, esli meydani töt yérim kwadirat kilométir kélidighan 20 mingdin artuq ishchisi bar dölet igilikidiki chong zawut idi. Mezkur zawut 7 - ayda weyran bolghanliqini élan qilghandin kéyin, ishtin boshutulghan ishchilar öz hoquqini qoghdash kürishini bashlighan. Ishchilar öz wekillirini saylap we mesile körülgen wekillerni tazilap , bir nishan we bir siyasette heriket élip barghan. Ular yene ichidin aktiplarni terbiyilep, i'ane toplash yoli arqiliq, namayishini teshkillik we tertiplik élip bériwatqan idi.

Weqening sewebliri

Ishchilar namayishi yüz bérishining asasliq sewebi heqqide baldurqi melumatlarda, mezkur zawutning, bu yil 7 - ayda weyran bolghanliqini élan qilip, ishchilarni ishtin boshatqanda, ularning soghurta mesilisini yaxshi bir terep qilmighanliqidin kélip chiqqan déyilgen idi.

Tégangdiki yashan'ghan ishchilarning yenimu ilgiriligen halda chüshendürüshiche, zawut bankirt bolghanliqini élan qilishtin burun, dungxu'a dep shirket qurghan bolup, dungxu'a shirkiti tégangning eslihelirini igiliwélip qayturup bermigen. Köpchilik buning xiyanetchilik bilen chétishliqi barliqidin gumanlan'ghan. Chünki dungxu'a shirkiti, zawutning esliheliri, yéri, öyi qatarliqlarni igilep turiwatqan bolup, eger zawut qanun boyiche weyran bolghan bolsa, choqum bu mülüklirini sétip, pulini hemmige bölüp bérishi kérek idi. Hazirqi mesile, ular bölüp bérish emes, hetta bu mülüklerni sétishqimu unimighan.

Dungxu'a shirkitini anglashlargha qarighanda, sheherlik iqtisad komitéti bilen yene bireylen birliship échiwatqan iken. Anglashlargha qarighanda, bu shirket her ayda nurghun pul ziyan tartiwatqan bolup, bu shirket zawutning barliq mülüklirini yoqqa chiqiramdu qandaq, buni héchkim bilmeydiken. Ishchilar namayishi yüz bérishining asasliq sewebi heqqide baldurqi melumatlarda, mezkur zawutning, bu yil 7 - ayda weyran bolghanliqini élan qilip, ishchilarni ishtin boshatqanda, ularning soghurta mesilisini yaxshi bir terep qilmighanliqidin kélip chiqqan déyilgen idi. (Arzu)