Б д т: бай‏- кәмбәғәлләр оттурисидики пәрқ хитайниң иҗтимаий муқимлиқиға тәһдит


2005.12.16

Б д т җүмә күни доклат елан қилип, бай‏- кәмбәғәлләр оттурисидики пәрқниң чоңийиши хитайда иҗтимаий муқимлиққа җиддий тәһдит салмақта, дәп агаһландурди.

Б д т, " хитайниң 2005 - йиллиқ инсан тәрәққият әһвали" намлиқ доклатида, йүз милйонлиған йәрлик йеза пуқралири вә көчмән ишчиларниң 25 йиллиқ иқтисади тәрәқққият мивисидин бәһриман болалмиғанлиқини оттуриға қоюп, хитай даирилиридин бу мәсилини һәл қилишни тәләп қилған.

Доклатта " кирим пәрқидики игиз - пәслик иҗтимаий тәңпуңсизлиқни кәлтүрүп чиқирип, ишсизлиқ вә хиянәтчиликни еғирлаштурмақта. Булар иҗтимаий муқимсизлиқни кәскинләштүриватқан амиллардур " дәйду.

Доклат б д т тәрәққият программиси тәрипидин һазирланған болуп, кирим пәрқиниң игиз - пәслики йезилардики бөлүнүшни күчәйтипла қалмай, шәһәрләрдики бай - кәмбәғәллик пәрқини чоңайтмақтикән. Доклатта " кирим пәрқиниң игиз -пәслики хитайдики драматик тәңсизликни әкс әттүриду " дәп тәкитлигән.

Б д т, доклатни һазирлаш басқучида пуқраларниң кирими, мәдәнийәт әһвали вә һаятқа болған үмидварлиқи қатарлиқ мәсилиләр бойичә тәкшүрүш елип барған. Франсийә ахбарат агентлиқиниң хәвәр қилишичә, бейҗиң иҗтимаий писхологийә тәтқиқат иниститути 2002 - йили декабирда елип барған хәлқ райини синашта, 80 % киши кирим пәрқидики игиз - пәсликни " әң зор иҗтимаий мәсилә " дәп қариған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.