Хитай террорчилиққа қарши "әң илғар" тәрбийиләш мәркизи қурушни пиланлимақта


2005.03.03

Хитай һөкүмити шинҗин шәһиридә өзлириниң атиши бойичә, дунядики әң илғар болған, терррорчилиққа қарши сақчиларни тәрбийиләш мәркизи қурушни пиланлимақта.

Шинхуа агентлиқиниң билдүрүшичә, хитай һөкүмити бу мәркәзни қурушқа 100 милйон йүән мәбләғ аҗратқан . Улар йәнә америка, гирманийә, япунийидин мутәхәссисләрни тәклип қилип, бу мәркәзни "дунядики әң илғар тәрбийиләш орни"ға айландуридикән.

Сақчилар бу йәрдә, қандақ қилип террористларға вә башқа һәр хил шәкилдики зораванлиқ һәрикәтләргә тақабил турушни өгинидикән. Хәвәргә қариғанда, террорчилиққа қарши сақчиларни тәрбийиләш мәркизи киләр йили ечилиши мумкин.

Хитай һөкүмити 11 - синтәбир вәқәсидин кийин, хәлқара террорчилиққа қарши көрәшкә актип аваз қошқан. Бирақ, ғәрб әллири вә кишилик һоқуқ тәшкилатлири хитай һөкүмитиниң террорчилиққа зәрбә беришни баһанә қилип, тинчлиқ билән өз сиясий вә диний көз қарашлирини оттуриға қойған уйғурларни бастуриватқанлиқини көрсәткән. Америка ташқи ишлар министирлиқиму дүшәнбә күни елан қилған кишилик һоқуқ доклатида бу хил әндишисини ипадилигән иди. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.