Б д т балилар фонди хитайни әйдиз мәсилисигә көңүл бөлүшкә чақирди

Хитайни зиярәт қиливатқан б д т балилар фонди җәмийитиниң баш дериктори кәрол бәламей хитайниң әйдиз мәсилисини аммиви сағламлиққа тәсир йеткүзидиған муһим мәсилә қатарида әһмийәт беришини сориди.

Ройтирс ахбарат агентлиқиниң хәвиригә қариғанда, кәрул бәламей пәйшәнбә күни бейҗиңда нутуқ сөзләп, "хитай һөкүмити әйдизниң мәвҗут бир мәсилә икәнликини етирап қилди. Әмма, у әйдиз мәсилисини бир қисим пуқраларғила әмәс, бәлки пүтүн амминиң саламәтликигә мунасивәтлик муһим мәсилә сүпитидә бир тәрәп қилиши керәк" - деди.

У йәнә хитай һөкүмитиниң әйдиз кесилиниң алдини елиш, учур, мулазимәт вә давалаш ишлирида нурғун риқабәтләргә дүч келидиғанлиқини көрсәтти. Униң билдүрүшичә, әйдиз вироси дунядики балиларға келиватқан әң чоң тәһдид һесаблинидикән.

Б д т балилар фондиниң баш дериктори кәрул бәламей, уларниң келәрки бәш йил ичидә хитайниң әйдиз кесилигә тақабил туруши үчүн 100 милйон доллар қиммитидики техника ярдими беришни пиланлаватқанлиқини көрсәткән.

Хитай һөкүмити, хитайда 840 миң кишиниң әйдиз вироси билән юқумланғанлиқини билдүрмәктә. Әмма мутәхәссисләр вә паалийәтчиләр, әмилийәттә хитайда әйдиз вироси билән юқумланғанлар саниниң бир милйондин бир йерим милйонға йәткәнликини мөлчәрлимәктә. (Арзу)