B d t balilar fondi xitayni eydiz mesilisige köngül bölüshke chaqirdi

Xitayni ziyaret qiliwatqan b d t balilar fondi jem'iyitining bash dériktori kerol belaméy xitayning eydiz mesilisini ammiwi saghlamliqqa tesir yétküzidighan muhim mesile qatarida ehmiyet bérishini soridi.

Roytirs axbarat agéntliqining xewirige qarighanda, kerul belaméy peyshenbe küni béyjingda nutuq sözlep, "xitay hökümiti eydizning mewjut bir mesile ikenlikini étirap qildi. Emma, u eydiz mesilisini bir qisim puqralarghila emes, belki pütün ammining salametlikige munasiwetlik muhim mesile süpitide bir terep qilishi kérek" - dédi.

U yene xitay hökümitining eydiz késilining aldini élish, uchur, mulazimet we dawalash ishlirida nurghun riqabetlerge düch kélidighanliqini körsetti. Uning bildürüshiche, eydiz wirosi dunyadiki balilargha kéliwatqan eng chong tehdid hésablinidiken.

B d t balilar fondining bash dériktori kerul belaméy, ularning kélerki besh yil ichide xitayning eydiz késilige taqabil turushi üchün 100 milyon dollar qimmitidiki téxnika yardimi bérishni pilanlawatqanliqini körsetken.

Xitay hökümiti, xitayda 840 ming kishining eydiz wirosi bilen yuqumlan'ghanliqini bildürmekte. Emma mutexessisler we pa'aliyetchiler, emiliyette xitayda eydiz wirosi bilen yuqumlan'ghanlar sanining bir milyondin bir yérim milyon'gha yetkenlikini mölcherlimekte. (Arzu)