B d t xitaydiki tekshürüshning tosqunluqsiz élip bérilishini ümid qildi

B d t kishilik hoquq komitétidiki ten jazasini tekshürgüchilerning ashkarilishiche, xitay hökümiti b d t xadimlirining xitayda tekshürüsh élip bérip, türmidiki mehbuslar bilen biwaste söhbetlishishige yol qoyudighanliqini wede qilghan. Kishilik hoquq komitétidiki tekshürgüchiler, xitay türmiliridiki mehbuslar bilen söhbetlishish arzusining bu yil küzde emelge éshishini ümid qildi.

Fransiye axbarat agéntliqining xewer qilishiche, b d t ning ten jazasini tekshürüsh xadimi manfrid nowak, xitay hökümitining bu heqtiki teklipnamisini tapshuruwalghan. U, kishilik hoquq komitétining “ tekshürüsh künini békitish basquchida” kétiwatqanliqini bildürdi. Manfrid nowak, xitayning xalighan türmini tekshürüsh shundaqla özi xalighan mehbus bilen söhbet ötküzüshke yol qoyush wediside turushini ümid qildi.

Xitay hökümiti yéqinqi yillardin béri b d t kishilik hoquq komitétidiki tekshürgüchilerning xitayda tekshürüsh élip bérishigha ruxset qilghan, amma xitay türmiliridiki ten jazasini tekshürüshige yol qoymighan idi. Öyken yili b d t xadimlirining Uyghur aptonom rayonida tekshürüsh élip bérish telipini ret qilghan. Buning bilen kishilik hoquq komitétidiki ten jazasini tekshürüsh emeldari tyo wan bowénning xitayni tekshürüsh pilani kéchiktürülgen.

Xitay hökümitining mehbuslargha tutqan mu'amilisi amérika we kishilik hoquq organlirining tenqidige uchrimaqta idi. 2003 - Yili xitay metbu'atlirida ten jazasi we qanunsiz qolgha élishni asas qilghan kishilik hoquqni depsende qilish témisidiki 1064 dilo pash qilindi. (Erkin)