B d t nopus fondi jem'iyiti xitay pilanliq tughut siyasitige bergen yardem türini aqlidi

B d t nopus fondi jem'iyiti düshenbe küni bayanat élan qilip, mezkur organning xitay pilanliq tughut siyasitige bergen yardem türini aqlidi. Nopus fondi jem'iyiti bayanatida, mezkur organning fondi jem'iyetni eng köp meblegh bilen teminleydighan 10 yawropa döliti teripidin mu'eyyenleshtürülgenlikini tekitligen.

Nopus fondi jem'iyitining bayanatida eskertishiche, yawropadiki bu 10 dölet " nopus fondi jem'iyiti bashqa döletlerdiki pa'aliyitige oxshashla xitayda xelq'ara nopus we tereqqiyat qurultiyining qararlirigha qet'i boysundi shundaqla bizning ortaq tirishchanliqimizni qollap, kishilik hoquq we asasi erkinlikni namayen qilish jehette muhim rol oynimaqta," dep tekitligen. Nopus fondi jem'iyitining bu sözlerni tilgha élishtiki sewebi, bu organ amérika qatarliq döletler teripidin xitay hökümitining kishilik hoquqqa xilap usullar bilen tughutni kontrol qilishigha yardem berdi, dep eyiblenmekte idi.

Bush hökümiti shu sewebtin amérikining nopus fondi jem'iyitige béridighan 35 milyon dollar yilliq yardimini tonglitip qoyghan. Uyghur kishilik hoquq we démokratiye herikitining rehbiri rabiye qadir, ötken yili amérika dölet mejliside bergen guwahliq sözide, b d t nopus fondi jem'iyitini eyibligen we xitayning Uyghurlargha qaratqan pilanliq tughut siyasitini " irqiy tazilash" tin perqiy yoq, dep atighan. Yéqinda Uyghur aptonom rayonining mu'awin re'isi jappar hebibulla, Uyghurlarni pilanliq tughut siyasitige ri'aye qilmaywatidu, dep eyiblidi. Japparning eskertishiche, bezi Uyghurlarning tughutni cheklesh mesiliside " idiyisi téxi azat bolmighan ".

B d t nopus fondi jem'iyitining xitayda élip barghan xizmitini maxtighan 10 dölet en'giliye, bélgiye, daniye, finlandiye, fransiye, gérmaniye, gollandiye, norwigiye, shwétsiye we shwétsariyilerni öz ichige alidu. Nopus fondi jem'iyiti eydizge qarshi yardem türi boyiche 2006 - yildin 2010 - yilghiche xitaygha 27 milyon dollar yardem bérishni qarar qilghan. (Erkin)