Б д т баш катипи бан - кимун хитайни тибәттә өзини тутивелишқа үндиди

Б д т баш катипи бан - кимунниң ашкарилишичә, у хитайниң б д т дики баш әлчиси билән көрүшүп, тибәт вәзийитидин пәвқуладдә әндишә қиливатқанлиқини билдүргән вә хитай даирилириниң тибәттә өзини тутувелишини тәләп қилған. Бан кимун алдинқи күни мухбирларға тибәт вәзийитини йеқиндин көзитиватқанлиқини билдүрди вә хитай даирилирини өзини тутивелишқа чақирди.

Шу күни һиндистан вә явропа иттипақидики бәзи дөләтләр хитай баш әлчилирини чақиртип, бан - кимунға охшаш тибәт вәзийитидин әндишә қиливатқанлиқини билдүргән иди. Америка ташқи ишлар министирлиқи хитай әмәлдарлири билән тибәт мәсилиси үстидә сөзләшкәнликини, лекин президент бушниң бейҗиң олимпик йиғиниға қатнишиш пиланида өзгириш болмиғанлиқини елан қилди. Америка йәнә, әркин асия радиоси вә америка авази радиосиниң тибәтчә аңлитишини күчәйтидиғанлиқини илгири сүргән.

Бан кимунниң баянати дүшәнбә күни б д т ниң нюйорктики баш шитабида хәвпсизлик кеңишиниң әзалири билән өткүзгән сөһбитидин кейин елан қилинған болуп, у " мән мунасивәтлик даириләрни өзини тутивелишқа шундақла илгирилигән һалда қаршилишиш вә зораванлиқ вастиларни қоллиништин сақлинишқа чақиримән " дәйду.

Бан - кимун " тибәт вәзийитидин пәвқуладдә әндишә қиливатқанлиқи " ни шу күни хитайниң б д т баш әлчиси ваң гуаңя билән көрүшкәндә тәкитлигән. Дүшәнбә күни һиндистан парламентидики өктичи партийә ‏ - гуруһларниң хитай даирилирини ибариси еғир сөзләр билән агаһландуруш тәклипи парламенттики бәзи гуруһларниң қоллишиға еришәлмигәндин кейин, улар йиғинни тәрк әтти. Һиндистан ташқи ишлар министирлиқи хитай даирилирини қорал күчи ишләтмәсликкә чақирған һәм мәсилини тинч йоллар билән һәл қилишқа үндигән иди. (Гүлчеһрә)