B d t bash katipi ban - kimun xitayni tibette özini tutiwélishqa ündidi

B d t bash katipi ban - kimunning ashkarilishiche, u xitayning b d t diki bash elchisi bilen körüshüp, tibet weziyitidin pewqul'adde endishe qiliwatqanliqini bildürgen we xitay da'irilirining tibette özini tutuwélishini telep qilghan. Ban kimun aldinqi küni muxbirlargha tibet weziyitini yéqindin közitiwatqanliqini bildürdi we xitay da'irilirini özini tutiwélishqa chaqirdi.

Shu küni hindistan we yawropa ittipaqidiki bezi döletler xitay bash elchilirini chaqirtip, ban - kimun'gha oxshash tibet weziyitidin endishe qiliwatqanliqini bildürgen idi. Amérika tashqi ishlar ministirliqi xitay emeldarliri bilen tibet mesilisi üstide sözleshkenlikini, lékin prézidént bushning béyjing olimpik yighinigha qatnishish pilanida özgirish bolmighanliqini élan qildi. Amérika yene, erkin asiya radi'osi we amérika awazi radi'osining tibetche anglitishini kücheytidighanliqini ilgiri sürgen.

Ban kimunning bayanati düshenbe küni b d t ning nyuyorktiki bash shitabida xewpsizlik kéngishining ezaliri bilen ötküzgen söhbitidin kéyin élan qilin'ghan bolup, u " men munasiwetlik da'irilerni özini tutiwélishqa shundaqla ilgiriligen halda qarshilishish we zorawanliq wastilarni qollinishtin saqlinishqa chaqirimen " deydu.

Ban - kimun " tibet weziyitidin pewqul'adde endishe qiliwatqanliqi " ni shu küni xitayning b d t bash elchisi wang gu'angya bilen körüshkende tekitligen. Düshenbe küni hindistan parlaméntidiki öktichi partiye ‏ - guruhlarning xitay da'irilirini ibarisi éghir sözler bilen agahlandurush teklipi parlaménttiki bezi guruhlarning qollishigha érishelmigendin kéyin, ular yighinni terk etti. Hindistan tashqi ishlar ministirliqi xitay da'irilirini qoral küchi ishletmeslikke chaqirghan hem mesilini tinch yollar bilen hel qilishqa ündigen idi. (Gülchéhre)