Xitay béyjing xelq'ara ayrodromining bixeterlik tedbirlirini kücheytti

Xitay da'iriliri sherqiy türkistan küchlirining béyjing olimpik yighinigha hujum qilish pilani qurghanliqini élan qilghandin kéyin, béyjing xelq'ara ayrodromida bixeterlik tedbirlirini kücheytip, bomba bayqash eswabi, mashina jahazlirini we ayrodromning ötüshme nuqtilirigha saqchi ponkitlirini qurghan.

" Xelq géziti" ning bu heqtiki xewiride, béyjing ayrodromidiki saqchilarning"bomba bayqash eswabi, réntigén mashinisi, heriketchan jahazilar, zorawanliqqa qarshi turidighan éléktronik mashina esliheliri bilen qorallandurulghanliqini" bildürdi.

Xewerde eskertishiche, da'iriler ayrodrom etrapida bixeterlik chembiriki qurup, ayrodromgha baridighan pütün yollarda saqchi ponkitlirini tesis qilish, ayrodrom xizmetchilirining arqa körünüshini tekshürüshni yolgha qoyidiken. Royétirs axbarat agéntliqi jüme künki xewiride, xitay da'irilirining bixeterlik tedbirini xitay tashqi ishlar ministirliqi emeldari nyu chingbawning aldinqi küni bélgiye paytexti bréyuséldiki bir yighinda "sherqiy türkistan küchliri olimpik yighinigha hujum qilish pilani qurdi" dégen sözlirige baghlidi hemde xitay köchmenlirining néfit bayliqi mol Uyghur yurtigha éqip kirishi yerlik xelqning ghezipini qozghawatqanliqini yazdi.

Lékin xitay tashqi ishlar ministirliqi emeldarining sözini tenqid qilghuchilar, Uyghurlarning olimpik yighinigha hujum qilish pilanining bolushi mumkin emeslikini, bu peqet xitay da'irilirining xelq'ara jem'iyetke bergen olimpik mezgilide kishilik hoquqni yaxshilash wedisini ijra qilmasliqning bir bahanisi ikenlikini. Chünki bixeterlik sewebi wediside turmasliqning eng yaxshi bahanisi bolalaydu, dep qarimaqta. Lékin xitay hökümiti kishilik hoquq heqqidiki pütün tenqidlerni ret qilip, olimpik bilen kishilik hoquqni arilashturuwétishke qarshi turdi. (Erkin)