ئولىمپىك كومىتېتى ئەمەلدارىنىڭ بېيجىڭ ئولىمپىك مۇسابىقىسى ھەققىدىكى سۆزى تەنقىدكە ئۇچرىدى


2007-07-13
Share

خەلقئارا كىشىلىك ھوقۇق تەشكىلاتلىرى جۈمە كۈنى خەلقئارا ئولىمپىك كومىتېتى ئەمەلدارىنىڭ بېيجىڭ ئولىمپىك مۇسابىقىسى ۋە كىشىلىك ھوقۇق مەسىلىسى ھەققىدىكى مەيدانىنى تەنقىد قىلدى.

خەلقئارا كىشىلىك ھوقۇق فېدىراتسىيىسى ۋە دۇنيا تەن جازاسىغا قارشى تۇرۇش تەشكىلاتى قاتارلىق ئورگانلار، خەلقئارا ئولىمپىك كومىتېتىنىڭ بېيجىڭ ئولىمپىك مۇسابىقىسىنى ماسلاشتۇرغۇچى ئەمەلدارى خەيىن ۋېربرۇگېننىڭ ئۆتكەن ھەپتە قىلغان بېيجىڭ ئولىمپىك مۇسابىقىسى ھەققىدىكى سۆزلىرى خىتاينى كىشىلىك ھوقۇق دەپسەندىچىلىكىگە كۈشكۈرتكەنلىك، دەپ ئەيىبلىدى. خەين ۋېربرۇگېن ئۆتكەن ھەپتە قىلغان سوزىدە بەزى ئىجتىمائىي پائالىيەتچىلەرنى بېيجىڭ ئولىمپىك مۇسابىقىسىدىن پايدىلىنىپ ئۆزىنىڭ تەشۋىقاتىنى ئېلىپ بارماسلىققا چاقىرغان ۋە بېيجىڭ ئولىمپىك مۇسابىقىسىدىن ئارتۇقچە ئۈمىد كۈرمەسلىكنى تەكىتلىگەن ئىدى.

يۇقىرىقى 2 خەلقئارا تەشكىلات ۋېربرۇگېنغا يازغان ئوچۇق خېتىدە، ئۇنىڭ سۆزى ئولىمپىك روھىغا خىلاپ بولۇپلا قالماي، خەلقئارا ئولىمپىك كومىتېتىنىڭ ئەخلاقىي پرىنسىپىغا زىت، دەپ كۆرسەتتى. ئوچۇق خەتتە يەنە مۇنداق دەيدۇ:" سىز بەزى كىشىلەر ئولىمپىك مۇنبىرىدىن پايدىلىنىپ كىشىلىك ھوقۇق تەشۋىقاتى ئېلىپ بارماقچى، دەپسىز شۇنداقلا بېيجىڭ ئولىمپىك مۇسابىقىسى تەييارلىق كومىتېتىدىن بۇ ئىشقا كىشىلىك ھوقۇق مەسىلىسى ئارىلىشىپ قېلىشدىن ساقلىنىش ئۈچۈن تەدبىر ئېلىشنى تەلەپ قىلىپسىز. بۇ كىشىلىك ھوقۇق پائالىيەتچىلىرىنى سىستېمىلىق تۈردە باستۇرىۋاتقان بېيجىڭ دائىرىلىرىنى ئىلھاملاندۇرۇپلا قالماي، كىشىلىك بىخەتەرلىكى ئىنتايىن قىيىن ئەھۋالدا تۇرغان كىشىلىك ھوقۇق پائالىيەتچىلىرىنى تېخىمۇ خەتەرلىك ئەھۋالغا ئىتەرگەنلىكتۇر."

ئوچۇق خەتتە، ۋېربرۇگېندىن بېيجىڭ ھۆكۈمىتى ئولىمپىك مۇسابىقىسىدىن پايدىلىنىپ كىشىلىك ھوقۇق پائالىيەتچىلىرىنى باستۇرماسلىقى كېرەكلىكى شۇنداقلا خەلقئارا ئولىمپىك كومىتېتى ب د ت كىشىلىك ھوقۇق ئومۇمى ئەھدىنامىسىنى قوللايدىغانلىقى توغرىسىدا ئاشكارا پىكىر بىلدۈرۈشنى تەلەپ قىلدى. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت