Olimpik komitéti emeldarining béyjing olimpik musabiqisi heqqidiki sözi tenqidke uchridi

Xelq'ara kishilik hoquq teshkilatliri jüme küni xelq'ara olimpik komitéti emeldarining béyjing olimpik musabiqisi we kishilik hoquq mesilisi heqqidiki meydanini tenqid qildi.

Xelq'ara kishilik hoquq fédiratsiyisi we dunya ten jazasigha qarshi turush teshkilati qatarliq organlar, xelq'ara olimpik komitétining béyjing olimpik musabiqisini maslashturghuchi emeldari xeyin wérbrugénning ötken hepte qilghan béyjing olimpik musabiqisi heqqidiki sözliri xitayni kishilik hoquq depsendichilikige küshkürtkenlik, dep eyiblidi. Xeyn wérbrugén ötken hepte qilghan sozide bezi ijtima'iy pa'aliyetchilerni béyjing olimpik musabiqisidin paydilinip özining teshwiqatini élip barmasliqqa chaqirghan we béyjing olimpik musabiqisidin artuqche ümid kürmeslikni tekitligen idi.

Yuqiriqi 2 xelq'ara teshkilat wérbrugén'gha yazghan ochuq xétide, uning sözi olimpik rohigha xilap bolupla qalmay, xelq'ara olimpik komitétining exlaqiy prinsipigha zit, dep körsetti. Ochuq xette yene mundaq deydu:" siz bezi kishiler olimpik munbiridin paydilinip kishilik hoquq teshwiqati élip barmaqchi, depsiz shundaqla béyjing olimpik musabiqisi teyyarliq komitétidin bu ishqa kishilik hoquq mesilisi ariliship qélishdin saqlinish üchün tedbir élishni telep qilipsiz. Bu kishilik hoquq pa'aliyetchilirini sistémiliq türde basturiwatqan béyjing da'irilirini ilhamlandurupla qalmay, kishilik bixeterliki intayin qiyin ehwalda turghan kishilik hoquq pa'aliyetchilirini téximu xeterlik ehwalgha itergenliktur."

Ochuq xette, wérbrugéndin béyjing hökümiti olimpik musabiqisidin paydilinip kishilik hoquq pa'aliyetchilirini basturmasliqi kérekliki shundaqla xelq'ara olimpik komitéti b d t kishilik hoquq omumi ehdinamisini qollaydighanliqi toghrisida ashkara pikir bildürüshni telep qildi. (Erkin)