Béyjing saqchiliri erkin qelemkeshler jem'iyitining yighilishini basiturushi mumkin

Xitay kishilik hoquq qoghdighuchiliri teshkilatining xewer qilishigha qarighanda, 19- dékabir shangxey sheherlik bixeterlik idarisi pudung rayonluq tarmiqining mexpiy xadimliri, shangxeylik yazghuchi we kishilik hoquq pa'aliyetchisi li jyenxungni nezerbend astigha alghan.

Shangxey mexpiy saqchilirining li xanimgha bildürüshiche, saqchilar uning 22- dékabir béyjingda élip bérilidighan xitay erkin qelemkeshler yighilishigha qatnishishining aldini élish üchün uni qolgha alghan iken.

Xewerde körsitilishiche, li xanim 14- dékabirdin bashlap keynige adem chüshkenlikini bayqighan. 15- Dékabir u saqchilarni éziqturush üchün dostining öyide qonup qalghan hemde mushu heptide oy köchüshni pilan qilghan bolsimu, 18- dékabir munasiwetlik bezi ishlarni bir yaqiliq qilish üchün öz öyige qaytqan.

Shu küni kechqurun bir bölek puqrache kiyin'gen saqchilar li xanimning öyige bésip kirip uni öyide nezer bend astigha alghan we 19- dékabir li xanim we uning dadisini saqchixanigha élip ketken.

Xewerde körsitilishiche, li xanim hazir bir méhmanxanida nezer bend astida yatmaqta iken. Saqchilarning uninggha éytqanlirigha qarighanda, uning qolgha élinishi béyjingdiki dölet bixeterlik tarmaqlirining buyruqi bilen élip bérilghan bolup, u 25- dékabirghiche qoyup bérilmeydiken.

Saqchilarning éytishiche yene, béyjing saqchiliri 22- dékabir élip bérilidighan erkin qelemkeshler jem'iyitining yighilishinimu bésiqturushi mumkin iken. (Jüme)