Xitay saqchiliri béyjinggha erzige mangghan xongkong démokratlirini chégrida tosuwalghan

Xitay xelq qurultiyi xongkong walisi zéng mingchüenning xongkongda démokratik islahat toghrisidiki doklatini shenbe küni muzakire qilishdin burun, béyjinggha bérip xitay da'iriliridin xongkonggha démokratiye bérishni telep qilmaqchi bolghan xongkong parlamént ezalirini xitay saqchilar shénjin tamozhnisida tosuwalghan.

Xongkong parlamént ezasi lyang goxungning eskertishiche, u 4 neper démokratik zat bilen peyshenbe küni béyjinggha barmaqchi bolup shénjin'gha kirgende puqrache kiyin'gen saqchilar ularni tamozhnida 30 minuttek tutup turghandin kéyin xongkonggha qayturuwétip, ularning ichidiki bir kishiningla béyjinggha bérishigha ruxset qilghan. Lyang goxung, saqchilarning yénidiki xet ‏- chek, matériyal we béyjing da'irilirige sunidighan iltimaslirini musadire qilghanliqini bildürdi. U, "xongkong xelqighe wakaliten béyjinggha démokratiye telep qilidighanliqimizni yetküzüsh bizning mes'uliyitimiz" deydu.

Xitay xelq qurultiyi da'imiy komitéti shenbe küni xongkong walisi zéng mingchüenning xongkongda démokratik islahat heqqidiki doklatini muzakire qilidu. Doklatta, zéng mingchüen xongkong walisini 2017 - yili omumi xelq bilet tashlap saylap chiqish pikirini otturigha qoyghan bolup, xongkongdiki démokratik küchler kéchikse 2012 - yili saylap chiqishni telep qilmaqta idi. Lékin royétirs axbarat agéntliqining jüme küni eskertishiche, xitay xelq qurultiyi xongkong walisini 2012 - yili saylash pikirini ret qilishi mumkin.

Xongkong awam partiyisining parlamént ezasi ronniy tang, royétirs agéntliqigha bergen bayanatida " bu xongkong xelqi üchün arqisi kelmeydighan yene 10 yil kéchikish dégenliktur " deydu. Xitay xelq qurultiyi 2004 - yili xongkong tüp qanunini chüshendürüsh hoquqining özide ikenlikini jakarlap, 2007 we 2008 - yilliri omumi xelq saylimi élip bérish telipini ret qilghan. (Erkin)