Хитайда химийә завутлириниң йеримидин көпрәки хәтәрлик

Өткән йили хитайниң җилин өлкисидики бир нефит -химийә завутида йүз бәргән партлаш вәқәсидин кейин, хитай дөләтлик муһит қоғдаш идарисиниң башлиқи сәйшәнбә күни хитай бойичә химийә завутлириниң йеримидин көпрәкидә бихәтәрлик мәсилиси мәвҗутлиқини агаһландурди.

Суң хуаҗияң дәрясиниң булғиниш вәқәсидә милйонлиған кишиниң ичимлик су мәсилиси тәсиргә учриған. Хитай дөләтлик муһит қоғдаш идарисиниң башлиқи җав шиңшйәнниң сәйшәнбә күни агаһландурушичә, хитайдики 21 миң химийә завутиниң йеримидин көпрәки чаңҗяң вә хуаңхе дәрялириниң вадисиға тарқалған болуп, бу завутларда рошән бихәтәрлик мәсилиси мәвҗут. Даириләр бу әһвалға диққәт қилишқа башлиған.

Җав шиңшйән мухбирларниң чаңҗяң вә хуаңхе дәряси бойидики химийә завутлирида бихәтәрлик мәсилиси мәвҗут болсиму, бирақ һөкүмәтниң немә үчүн бу мәсилигә әмди диққәт қиливатқанлиқи һәққидики суалиға җавап берип, дөләт қурулған дәсләпки йилларда җуңгониң муһитни қурбан қилиш бәдилигә иқтисади тәрәққиятни сақлиғанлиқини етирап қилди.

Франсийә ахбарат агентлиқиниң әскәртишичә, суң хуаҗяң дәрясиниң булғиниш мәсилиси хитайларда иқтисади тәрәққият кәлтүрүп чиқарған муһит тәһдитиниң хәвп - хәтиригә қарита тонуш пәйда қилған. Хитай даирилириниң статистика қилишичә, хитайда дәря - көлләрниң 70 % и булғанған болуп, хитай бойичә 600 шәһәрниң 400 идә су йитишмәслик мәсилиси мәвҗүт икән. Уйғур аптоном райониниң мәркизи үрүмчи хитай бойичә су йитишмәслик мәсилиси әң еғир шәһә рболуп һесаблиниду. (Әркин)