Xitayda ximiye zawutlirining yérimidin köpreki xeterlik

Ötken yili xitayning jilin ölkisidiki bir néfit -ximiye zawutida yüz bergen partlash weqesidin kéyin, xitay döletlik muhit qoghdash idarisining bashliqi seyshenbe küni xitay boyiche ximiye zawutlirining yérimidin köprekide bixeterlik mesilisi mewjutliqini agahlandurdi.

Sung xu'ajiyang deryasining bulghinish weqeside milyonlighan kishining ichimlik su mesilisi tesirge uchrighan. Xitay döletlik muhit qoghdash idarisining bashliqi jaw shingshyenning seyshenbe küni agahlandurushiche, xitaydiki 21 ming ximiye zawutining yérimidin köpreki changjyang we xu'angxé deryalirining wadisigha tarqalghan bolup, bu zawutlarda roshen bixeterlik mesilisi mewjut. Da'iriler bu ehwalgha diqqet qilishqa bashlighan.

Jaw shingshyen muxbirlarning changjyang we xu'angxé deryasi boyidiki ximiye zawutlirida bixeterlik mesilisi mewjut bolsimu, biraq hökümetning néme üchün bu mesilige emdi diqqet qiliwatqanliqi heqqidiki su'aligha jawap bérip, dölet qurulghan deslepki yillarda junggoning muhitni qurban qilish bedilige iqtisadi tereqqiyatni saqlighanliqini étirap qildi.

Fransiye axbarat agéntliqining eskertishiche, sung xu'ajyang deryasining bulghinish mesilisi xitaylarda iqtisadi tereqqiyat keltürüp chiqarghan muhit tehditining xewp - xetirige qarita tonush peyda qilghan. Xitay da'irilirining statistika qilishiche, xitayda derya - köllerning 70 % i bulghan'ghan bolup, xitay boyiche 600 sheherning 400 ide su yitishmeslik mesilisi mewjüt iken. Uyghur aptonom rayonining merkizi ürümchi xitay boyiche su yitishmeslik mesilisi eng éghir shehe rbolup hésablinidu. (Erkin)