Хитай сиясий кеңәш йиғинида "бөлүнүшкә қарши қанун лайиһиси"қизиқ темиға айланди
2005.03.03
Хитайниң мәмликәтлик сиясий кеңәш 10 - нөвәтлик үчинчи омумий йиғини пәйшәнбә күни бейҗиңда ечилди.
Америка бирләшмә ахбарат агентлиқиниң хәвиригә қариғанда, бу қетимқи йиғинда чәтәл мухбирлири асаслиқи икки мәсилигә диққәт қилмақта. Бири, хитайниң "бөлүнүшкә қарши қануни лайиһиси". Йәнә бири, хоңкоңниң мәмурий башлиқи дуң җйәнхуаниң истипа бериш мәсилиси икән.
Хитайниң сиясий кеңәш рәиси җя чиңлин йиғинда хизмәт доклати берип, йиғинға қатнашқан икки миңдин артуқ вәкилләрни "бөлүнүшкә қарши қанун"ни тездин бекитип, тәйвәнниң һәр қандақ шәкилдики мустәқиллиқ һәрикәтлирини чәкләшкә чақирған. Бу қанун лайиһиси шәнбә күни ечилидиған хитай хәлқ қурултийиниң йиғини җәрянида музакирә қилиниду.
Хәвәргә қариғанда, хитай даирилири гәрчә мәзкур қанун икки қирғақ мунасивитигә тәсир йәткүзмәйду дәп билдүргән болсиму, бирақ тәйвән, хитайниң бу қанунни, тәйвәнгә һуҗум қилиштики қануний асас қилишидин әндишә қилмақта.
Буниңдин сирт, хоңкоң мәтбуатлириниң билдүрүшичә, сиясий кеңәш йиғинда йәнә хоңкоң алаһидә мәмурий раюнниң башлиқи доң җйәнхуа хитайниң мәмликәтлик сиясий кеңишиниң муавин рәисликигә тәйинлиниши мумкин икән. У сиясий кеңәшниң муавин рәисликигә тәйинләнгәндин кийин, андин өзиниң хоңкоң мәмурий район башлиқлиқ вәзиписидин истипа бәргәнликини җакалиши мумкин икән. (Арзу)
Мунасивәтлик мақалилар
- Хәлқ вәкиллири бейҗиңгә кәлгәндә, һөкүмәт сақчилири хәлқни тутқун қилған
- Хитай сақчилири икки йиғинниң һарписида бихәтәрлик тәдбирлирини күчәйтти
- Ло гән, " дүшмән күчләр" ни бастуридиғанлиқини җакарлиди
- Тәйвән иттипақ уюшмиси "йүтүвелишқа қарши қануни" ни түзүшни тәләп қилди
- Чен шүйбйән, бөлүнүшкә қарши қанунниң икки қирғақни техиму йирақлаштуридиғанлиқини билдүрди