Xitay siyasiy kéngesh yighinida "bölünüshke qarshi qanun layihisi"qiziq témigha aylandi


2005.03.03

Xitayning memliketlik siyasiy kéngesh 10 - nöwetlik üchinchi omumiy yighini peyshenbe küni béyjingda échildi.

Amérika birleshme axbarat agéntliqining xewirige qarighanda, bu qétimqi yighinda chet'el muxbirliri asasliqi ikki mesilige diqqet qilmaqta. Biri, xitayning "bölünüshke qarshi qanuni layihisi". Yene biri, xongkongning memuriy bashliqi dung jyenxu'aning istipa bérish mesilisi iken.

Xitayning siyasiy kéngesh re'isi jya chinglin yighinda xizmet doklati bérip, yighin'gha qatnashqan ikki mingdin artuq wekillerni "bölünüshke qarshi qanun"ni tézdin békitip, teywenning her qandaq shekildiki musteqilliq heriketlirini chekleshke chaqirghan. Bu qanun layihisi shenbe küni échilidighan xitay xelq qurultiyining yighini jeryanida muzakire qilinidu.

Xewerge qarighanda, xitay da'iriliri gerche mezkur qanun ikki qirghaq munasiwitige tesir yetküzmeydu dep bildürgen bolsimu, biraq teywen, xitayning bu qanunni, teywen'ge hujum qilishtiki qanuniy asas qilishidin endishe qilmaqta.

Buningdin sirt, xongkong metbu'atlirining bildürüshiche, siyasiy kéngesh yighinda yene xongkong alahide memuriy rayunning bashliqi dong jyenxu'a xitayning memliketlik siyasiy kéngishining mu'awin re'islikige teyinlinishi mumkin iken. U siyasiy kéngeshning mu'awin re'islikige teyinlen'gendin kiyin, andin özining xongkong memuriy rayon bashliqliq wezipisidin istipa bergenlikini jakalishi mumkin iken. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.