Xu jintaw, armiyini her zaman urushqa teyyarliq halette turushqa chaqirdi

Xitay dölet re'isi xu jintaw yekshenbe küni xitay armiyisini dölet térritoriyisining pütünlükige kapaletlik qilish üchün, her zaman urushta ghelibe qilishqa teyyarliq körüshke chaqirdi.

U bu sözni xitayning memliketlik xelq qurultiyidiki armiye wekilliri bilen körüshkende éytqan. U sözide, " armiyimiz choqum döletning igilik hoquqi, bixeterliki we zémin pütünlikini qoghdash wezipisini hemmidin yuqiri orun'gha qoyushi kérek" - dégen.

Düshenbe küni xitay xelq qurultiyi " döletni parchilashqa qarshi qanun" ni maqullishi mölcherlenmekte. Bu qanun xitay armiyisige teywen musteqilliq élan qilghan shara'itta, teywen'ge hujum qilish üchün qanuniy asas yaritip béridu.

Yekshenbe küni xu jintaw xitay xelq qurultiyi teripidin xitay merkizi herbiy komitétining re'islikige teyinlen'gen. Gerche bu wezipe asasen simwol xaraktérliq bolsimu, biraq xu jintaw buning bilen, xitayning sabiq rehbiri jyang zéminning barliq wezipisini ötküzüwélip, xitaydiki toluq hoquqluq rehberge aylandi. (Arzu)