Xitay, teywenni jiddiy weziyet yaratti dep eyiplidi

Xitay hökümiti teywenni, béyjingning yéngidin chiqarghan "döletni parchilashqa qarshi qanuni" gha qarshi keng kölemlik naraziliq namayishi uyushturush arqiliq, jiddi weziyet yaritishqa urundi, dep eyiplidi.

Xitay hökümitige qarashliq shinxu'a agéntliqi yekshenbe küni élan qilghan obzorida, " teywendiki musteqilchi küchler, teywen boghizining muqimliqi we tinchliqigha nisbeten eng chong tehdid" dep körsetken. Obzorda yene, "döletni parchilashqa qarshi qanunidiki tinchliqsiz wastilar teywendiki bölgünchi küchlerge qaritilghan. Teywen xelqige qaritilghan emes" déyilgen.

Teywen prézidénti chin shüybyen, nechche on minglighan namayishchilar bilen birlikte shenbe küni teybéy kochilirigha chiqip namayish ötküzüp, xitayning "döletni parchilashqa qarshi qanuni" gha naraziliq bildürgen idi. Bu qanunda teywen heqiqiy musteqilliqqa qarap mangghan shara'itta, teywen'ge qarita herbiy heriket élip bérish belgilen'gen.

Teywenning hakimiyettiki démokratiye tereqqiyat partiyisi, shenbe künidiki namayishning, xitay chong quruqluqining tajawuzchiliqigha qarshi turushta teywenning birdek uyushqaqliqini ipadileshni meqset qilidighanliqini bildürdi. Xewerlerge qarighanda, ikki yüz mingdin artuq namayishchilar teybéyda oxshash bolmighan 10 liniyini boylap namayish ötküzüp, andin prézidént mehkimisining aldidiki meydan'gha yighilghan. Ular teywenning démokratiyisi we tinchliqini qoghdaydighanliqini bildürüshken.

Amérika we bashqa döletler xitay hökümitining bu qanundin paydilinip, teywen'ge hujum qilishidin endishe qilmaqta. Xitay bolsa, teywenni öz térritoriyisining bir qismi dep qaraydu. (Arzu)