Хитайда терилғу йәрләрниң булғиниши еғирлашмақта

Көмүр қалайдиған завутлар вә керәксиз су йоллири хитайдики терилғу йәрләрниң булғинишини күнсайин еғирлаштуруп, хитай йеза игиликигә нәччә милярд долларлиқ зиян елип кәлмәктә.

Франсийә агентлиқиниң 9 ‏- април хитай күндилик хәвәрләр гезитидин нәқил кәлтүрүп хәвәр қилишичә, хитайда һәр йили 12 милйон тонна данлиқ зираәт еғир метал маддилар билән зәһәрлинидиған болуп, бу 20 милярд йүән иқтисади зиян кәлтүрүп чиқиридикән.

Хәвәрдә қәйт қилишичә йәнә, хитайда 10 милйон гектар терилғу йәр хараб қилинған болуп бу хитай омуми терилғу йәр көлиминиң 10 пирсәнтни игиләйдикән. Терилғу йәрләрниң булғиниши вә хараб болушида хитайдики көмүр санаитиниң тәсири асасий орунда туридиған болуп, хитайда һәр йили 2 милярд тонна көмүр көйдүрүлүп, 2 миң тонна әтрапидики симабни һаваға қоюп берилидикән.

Униңдин башқа, хитайдики мевә-чивә, сәй-көктатлар дегүдәк химийивий оғут тәркибидики азотлуқ туз билән зәһәрләнгән икән. Хитайда бурун берилгән хәвәрләрдә 70 пирсәнт суй йоллири вә 90 пирсәнт йәр асти суйи булғанғанлиқи көрситилгән болсиму, әмма йәр-тупрақниң булғиниши һәққидики мәсилиләр тилға елинмай кәлгән иди.

Уйғур мутәхәссисләрниң қаришичә, уйғур елидә йәр-тупрақниң булғиниши техиму еғир икән. Буларни асасән, химийивий оғут қалдуқлири, көмүр қалаш, әң әҗәллик йери атом радиатсийиси кәлтүрүп чиқарған болуп, булғиниш уйғур елидә һаят кәчүрүватқан милйонлиған хәлқ аммисиниң һаятиға һәрхил тәһдитләрни елип кәлмәктә икән. (Җүмә)