Gherbiy jenubi xitayda nechche ming amma bulghinishqa qarshi namayish élip bardi

Gherbiy jenubi xitayda nechche ming amma bu rayon'gha qurulghan piwa zawuti ichimlik su menbiyini bulghidi, dep eyiblep namayish élip bardi.

Bash shtabi xongkonggha jaylashqan " kishilik hoquq we démokratiye uchur merkizi "ning bildürüshiche, sichüen ölkisi tewesidiki yüenshi yézisida nechche ming amma ichimlik we sughirishqa ishlitidighan su menbeyining bulghinishigha qarshi namayish élip barghan.

Namayishchi amma 26- iyul sichüen ölkisi shifang shehirige jaylashqan piwa zawutini qorshiwalghan we zawutni palech halgha chüshürüp qoyghan.

Bu namayishini tinchitish üchün, xitay saqchi da'iriliri 500 din artuq qoralliq saqchi qisim eskerlirini heriketke keltürgen bolup, netijide saqchilar bilen namayishchi amma arisida keskin toqunush yüz bergen. Toqunush jeryanida 20 adem yarilan'ghan we 7 adem qolgha élin'ghan.

Bundin burunmu xitayning bashqa jaylirida bulghinishqa qarshi kop qétim namayishlar yüz bergen bolup bu yilning béshida fujyen ölkisidiki yerlik amma bulghinishqa qarshi namayish élip barghan idi.

Kishilik hoquq teshkilatlirining bildürüshiche, bu qétimqisi xitayda bulghinishqa qarshi élip bérilghan eng yéngi namayish iken. (Jüme)