Prézidént bush 3 neper terepsiz xristi'an chérkaw pa'aliyetchisini aq sarayda qobul qildi

Amérika prézidénti jorji bush peyshenbe küni xitay chong quruqluqidin kelgen yüy jyé, wang yiy we li beygu'ang qatarliq 3 neper terepsiz xristi'an chérkaw pa'aliyetchisini aq sarayda qobul qilip, bir sa'et söhbet élip bardi we diniy erkinlik, kishilik hoquq mesililiri boyiche pikir almashturdi.

Prézidént bush söhbet jeryanida diniy erkinlik bir jem'iyetning saghlam tereqqiyatini ilgiri sürüsh rolini oynaydu, dep tekitligen. U, "junggo iqtisadi üzliksiz tereqqi qilmaqta. Lékin bir jem'iyet inaq wemuqim bolmaqchi bolsa, choqum diniy ibadet erkinliki bolushi kérek. Shundaq bolghandila andin jem'iyet muqimliq asasigha ige bolghan bolidu" deydu. Bush, buningdin kéyin xitay rehberliri bilen uchrashqanda junggoning diniy erkinlik mesilisini dawamliq otturigha qoyidighanliqini bildürgen.

Yüy jyéning söhbettin kéyin muxbirlargha ashkarilishiche, söhbet jeryanida u Yahoo tor izdesh ponkitining mesilisini otturigha qoyghan we Yahoo ponkitining junggodiki herikiti amérika qimmet qarishigha we dölet qurush prinsipigha xilap, dep qaraydighanliqini bildürgen. Wang yi, prézidént bush bilen diniy erkinlik we ibadet kechürmüshliri heqqide söhbet élip barghanliqini bildürdi.

Wang yiy bilen yüy jyé xitaydiki ataghliq öktichi yazghuchilar bolup hésablinidu. Li beygu'ang bolsa kishilik hoquqni qoghdighuchi adwokat. Bu 3 neper xristi'an muxlisi xitay xristi'anlirigha wekil bolup washin'gtonda chaqirilghan junggoning erkinlik ehwali heqqidiki bir yighin'gha qatnishish üchün kelgen. (Erkin)