Чегрисиз мухбирлар тәшкилати хитайни чәтәллик мухбирларға тосқунлуқ қилиш билән әйиблиди

2008-01-11
Елхәт
Пикир
Share
Принт

Чегрисиз мухбирлар тәшкилати хитай бихәтәрлик органлирини дөләтниң олимпик мәзгилидики ахбарат әркинлик бәлгилимисигә хилаплиқ қилип, хитай өктичилиридин әйдиз паалийәтчиси ху җяниң өйини зиярәт қилмақчи болған чәтәллик мухбирларға тосқунлуқ қилиш шундақла адвокатниң ху җя билән көрүшүш һоқуқиға бузғунчилиқ қилиш билән әйиблиди.

Мәркизи париждики чегрисиз мухбирлар тәшкилати җүмә күни елан қилған баянатида хитай даирилириниң ху җяни қоюветиш һәққидики чақириқларға писәнт қилмайла қалмай, ху җяниң аяли сең җинйән вә униң бовиқини нәзәрбәнт қилғанлиқини тәнқид қилди.

Ху җяниң адвокатиниң ахбарат саһәсигә ашкарилишичә, сақчилар адвокатниң пәйшәнбә күни сең җинйән билән көрүшүшини чәкләп, бейҗиңдики бир меһманханиға бир қанчә саәт қамап қойған вә ху җяниң луй фаңпиң исимлик йәнә бир адвокатини сең җинйән билән көрүшмәсликкә агаһландурған. Җүмә күни сақчилар ху җияниң өйини зиярәт қилмақчи болған чәтәллик мухбирларни тосап, уларниң паспортини тәкшүрди һәм мухбирлар тартқан рәсимләрни мусадирә қилди.

Алдинқи күни ху җяниң аяли өйиниң балкуниға чиқип, германийилик мухбирларға сақчиларниң өйидики интернет вә телефон алақисини үзүп ташлиғанлиқини билдүргән. Шуниңдин кейин сақчилар ху җяниң өйиниң пүтүн деризилирини төмүр қаңалтир билән қапливәткән. Нөвәттә 20 дәк сақчи ху җяниң бейҗиңдики өйини назарәт қилмақта икән.

Ху җя хитайдики көзгә көрүнгән әйдиз паалийәтчилиридин болуп, у буниңдин бир қанчә һәптә илгири туюқсиз йоқап кәткәндин кейин, хитай даирилири униң "дөләт мәхпийәтлик "игә четилип қелиш сәвәбидин қолға елинғанлиқини җакарлиған. (Әркин)

Пикирләр (0)
Share
Толуқ бәт