Хитайда һөкүмәт әмәлдарлириниң көмүр канларға пайчек болуши чәкләнди
2005.09.23
Хитай һөкүмити йеқинда көмүр канға мәбләғ салған һөкүмәт әмәлдарлириниң 22 - сәнтәбиргичә пайчекини сетиветиш керәклики тоғрисида уқтуруш чүшүрүп, буни рәт қилғучилар вәзиписидин елип ташлинидиғанлиқини агаһландурған. Әмма енглизчә чиқидиған "җоңго гезити" ниң хәвәр қилишичә, һөкүмәтниң бу қарари йәрлик даириләрниң қаршилиқиға учриған болуп, бәзи әмәлдарлар вәзиписидин елип ташлинишқа разики пай чекини сетишқа рази әмәскән.
Хитайда көмүргә болған еһтияҗдики артиш көмүр канлириға мәбләғ салғучиларни зор пайдиға ериштүрмәктә иди. Буниң билән көмүр кан пайлирини сетивелиш һөкүмәт органлиридики әмәлдарлар наһайити қизиқидиған сода болуп қалған.
Бу йил 7 - айниң 11 - күни көмүркан астида газ партлап, 83 нәпәр ишчиниң өлүшини кәлтүрүп чиқарған уйғур аптоном райониниң фукаң наһийисидики шәнлоң көмүр кениниң пай чеки, қумул көмүрчилик гуруһидики әмәлдарларниң илкидә иди. Қумул көмүрчилик гуруһи уйғур аптоном районидики хитай бойичә әң чоң көмүр канлириниң бири. Шинхуа ахбарат агентлиқиниң ашкарилишичә, вәқә йүз бәргән канниң пай чекини қумул көмүрчилик гуруһиниң баш мудири вә мәзкур ширкәттики хизмәтчиләр игилливалған.
Бу йил хитай бойичә көмүр кан вәқәлиридә өлгән кишиләр 3000 дин ашиду. Хитай һөкүмити көмүр канларниң тәртипкә селиш тоғрисида көп қетим уқтуруш чиқарған болсиму, әмма бу тәдбирләрниң һечқандақ үнүми болмиди. (Әркин)
Мунасивәтлик мақалилар
- Хитайда, көмүр кан ишчилири билән сақчилар арисида тоқунуш йүз бәрди
- Хитайдики көмүр кан һадисилиридә алтә һәптә ичидә 700 ичи өлди
- Чәй зуңго хитайдики көмүр кан мәсилиси һәққидә тохталди
- Диң җув шәһириниң сабиқ партком секритари тупрақни қанунсиз игиливелиш сәвәбидин қолға елинди
- Хитайдики һөкүмәткә қарашлиқ орунларниң хиянәт қилған соммиси 10 милярд юәнгә йеқинлашқан