Xitayda hökümet emeldarlirining kömür kanlargha paychék bolushi cheklendi

Xitay hökümiti yéqinda kömür kan'gha meblegh salghan hökümet emeldarlirining 22 - sentebirgiche paychékini sétiwétish kérekliki toghrisida uqturush chüshürüp, buni ret qilghuchilar wezipisidin élip tashlinidighanliqini agahlandurghan. Emma én'glizche chiqidighan "jonggo géziti" ning xewer qilishiche, hökümetning bu qarari yerlik da'irilerning qarshiliqigha uchrighan bolup, bezi emeldarlar wezipisidin élip tashlinishqa raziki pay chékini sétishqa razi emesken.

Xitayda kömürge bolghan éhtiyajdiki artish kömür kanlirigha meblegh salghuchilarni zor paydigha érishtürmekte idi. Buning bilen kömür kan paylirini sétiwélish hökümet organliridiki emeldarlar nahayiti qiziqidighan soda bolup qalghan.

Bu yil 7 - ayning 11 - küni kömürkan astida gaz partlap, 83 neper ishchining ölüshini keltürüp chiqarghan Uyghur aptonom rayonining fukang nahiyisidiki shenlong kömür kénining pay chéki, qumul kömürchilik guruhidiki emeldarlarning ilkide idi. Qumul kömürchilik guruhi Uyghur aptonom rayonidiki xitay boyiche eng chong kömür kanlirining biri. Shinxu'a axbarat agéntliqining ashkarilishiche, weqe yüz bergen kanning pay chékini qumul kömürchilik guruhining bash mudiri we mezkur shirkettiki xizmetchiler igilliwalghan.

Bu yil xitay boyiche kömür kan weqeliride ölgen kishiler 3000 din ashidu. Xitay hökümiti kömür kanlarning tertipke sélish toghrisida köp qétim uqturush chiqarghan bolsimu, emma bu tedbirlerning héchqandaq ünümi bolmidi. (Erkin)