Teywen prézidénti spratili taqim arallirini ziyaret qildi

Teywen prézidénti chin shüybiyen, shenbe küni talash-tartishtiki spratli taqim arallirini ziyaret qilip, bu arallar ichidiki teypik arilida teywen armiyisi teripidin yasalghan ayrodurumni közdin köchürdi.

Xewerlerge qarighanda, chin shüybiyenning spratili taqim arallirigha qaratqan bu qétimqi ziyariti, mezkur arallarning igilik hoquqini talishiwatqan döletlerning qattiq naraziliqini qozghighan. Xitay, filippinler, wyétnam, malayshiya,we brunéy qatarliq döletler, jenubiy jonggu déngizigha jaylashqan we mol néfit we tebi'y gaz zapisigha ige bolghan spratli taqim arallirining hemmisi weyaki bir qisimining igilik hoquqining özlirige a'it ikenlikini, tekitlimekte.

Teywen prézidénti chin shüybiyenning spratili taqim arallirigha qaratqan bu qétimqi ziyariti, mezkur arallar ning igilik hoquqi üstide, rayondiki döletler otturisida mewjut ixtilap keskinleshken bir mezgilge toghra keldi.

Spratili taqim arallirining igilik hoquq mesilisi tüpeylidin xitay bilen wyétnam otturisida 1988‏- we 1992‏- yilliri ikki qétim toqunush yüz bergen. Siyasiy mulahizichiler, chin shüybiyenning ziyariti, rayondiki weziyetni téximu keskinleshtüridu, déyishmekte.

Filippilerning tashqi ishlar ministiri, alberto romulo, shenbe küni bayanat élan qilip, chin shuybiyenning ziyaritining jiddiy endishe yaratqanliqini bildürdi. U, "spratili aralliri üstidiki ixtilaplar tinchliq we diplomatiye yoli arqiliq bir terep qilinishi kérek" dep körsetti.

Teywen metbu'ati bolsa, chin shüybiyenning spratili taqim arallirigha qaratqan ziyaritining, 22‏ - mart küni teywende élip bérilidighan prézidént saylimida, teywen démokratiye we tereqqiyat partiyisining prézidént namzati, frank shéning ornini kücheytishni meqset qilghanliqini, bildürmekte. (Ömer qanat)