Chin shüybyen " bir dölet , ikki xil tüzüm" ni ret qildi

Teywendiki öktichi gomindang partiyisining rehbiri lyen jen xitayni ziyaret qiliwatqan bir peytte, teywen prézidénti chin shüybyen teybéyde bayanat élan qilip, xitay otturigha qoyiwatqan "bir dölette ikki xil tüzüm" shekli bilen birlikke kélishni ret qildi.

Chin shüybyen sözide, "ikki qirghaq otturisidiki eng chong ixtilap, siyasiy ixtilap bolmastin, belki démokratik tüzüm we turmush usuli jehettiki perq. Eger xitay chong quruqliqi démokratik saylam tüzümini yürgüzmise, armiyini döletning bashqurulushigha ötküzmise, xelqning söz we diniy erkinlikige toluq kapalet qilmisa, ikki qirghaq siyasiy jehettin birlishelmeydu" -dédi.

U yene xitayning xongkong we makawni qayturiwélishta otturigha qoyghan " bir dölette ikki xil tüzüm" siyasitini tenqid qilip, buning peqet yalghan, quruq söz ikenlikini bildürdi.

Roytiris agéntliqining xewirige qarighanda, teywen gomindang partiyisining rehbiri lyen jen peyshenbe küni béyjinggha yitip kelgen bolup, u jüme küni ikki qirghaq munasiwitini yaxshilash mesiliside xitay dölet re'isi xu jintaw bilen söhbet ötküzidu. Analizchilar, ularning söhbitining smowol xaraktérlik rol oynaydighanliqini bildürmekte.

Buning aldida, teywen prézidénti chin shüybyen lyen jenning xitay ziyaritige yaxshi tileklirini bildürgen. Biraq, uni hökümet ishlirigha arilashmasliq heqqide agahlandurghan idi.

Bu arida, amérika hökümiti bayanat élan qilip, teywen öktichi partiye rehbiri lyen jen bilen xu jintawning söhbet ötküzüshni qarshi alidighanliqini bildürdi. Shundaqla xitay hökümitini teywen prézidénti chin shüybyen bilen biwaste söhbet élip bérishqa chaqirdi. (Arzu)