Хитай, чен шүйбйәнниң дөләт бирлики мәҗлисини бикар қилиш қаришини күчлүк әйиблиди


2006.02.26
Share on WhatsApp
Share on WhatsApp

Хитайниң тәйвән ишлириға мәсул икки чоң ишханиси йәкшәнбә күни баянат елан қилип, тәйвән президенти чен шүйбйәнниң дөләт бирлики мәҗлисини бикар қилиш қаришини күчлүк әйиблиди.

Хитайниң дөләт кабинтиниң тәйвән ишлири ишханиси вә хитай компартийә мәркизи тәйвән хизмити ишханиси бирликтә чиқарған бу баянатида, чен шүйбйәнниң дөләт бирлики мәҗлисини бикар қилиш һәрикитиниң, тәйвән боғузиниң бихәтәрликигә зиян салидиғанлиқини әскәртти.

Баянатта йәнә, " чен шүйбйәнниң бу һәрикити, асасий қанунни өзгәртиш арқилиқ тәйвән мустәқиллиқини қанунлаштурушқа урунғанлиқ" дәп көрситилгән. Униңда йәнә, чен шүйбйәнниң тәйвәнниң мустәқиллиқини қолға кәлтүрүш йолидики тиришчанлиқиниң барғансери ешиватқанлиқи һәмдә буниң, тәйвән боғузи җүмлидин асия тинч-окян райониниң бихәтәрликигә тәһдит болидиғанлиқи тәкитләнгән.

Бу икки орган баянатида йәнә, чен шүйбйәнниң бу һәрикитидин тез ваз кечиши керәкликини тәкитләп, хитайниң һәргизму тәйвәнниң мустәқиллиқиға йол қоймайдиғанлиқини билдүрди. Хитайниң баянатиға қарита тәйвән мәмурий мәһкимисиниң хитай ишлири комитети дәрһал инкас қайтуруп, әсли хитай һөкүмити өзиниң тәйвән боғузиға тәһдит селиватқанлиқини билдүрди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.