Чен шүйбйән дөләтни бирликкә кәлтүрүш комитети вә программисини бикар қилди


2006.02.27
Share on WhatsApp
Share on WhatsApp

Тәйвән президенти чен шүйбйән дүшәнбә күни тәйвән һөкүмитиниң хитай чоң қуруқлуқини бирликкә кәлтүрүш нийитидин ваз кәчкәнликини җакарлиди. Хитайниң тәйвән ишлири ишханиси болса җуңго тәрәпниң " тәйвән мустәқиллиқи" вә " тәйвән бөлгүнчи күчлири" гә қәти йол қоймайдиғанлиқини елан қилған.

Президент чен шүйбйән, дүшәнбә күни тәйвән дөләт хәвпсизлик комитетиниң йиғинидин кейин, тәйвәнниң хитай чоң қуруқлуқиға қаритилған дөләтни бирликкә кәлтүрүш комитети вә дөләтни бирликкә кәлтүрүш программисиниң тохтутулғанлиқини билдүрди. Әмма у, тәйвән боғизиниң һазирқи һалитини өзгәртиш нийити йоқлиқини тәкитлигән.

Җаң кәйши вә униң гоминдаң һөкүмити 1949 - йили хитай комунистлириға мәғлуб болуп тәйвәнгә қечип барғандин кейин, күнләрниң биридә хитай чоң қуруқлуқиға қайтип кетиш нийитидин ваз кәчмигән иди. Әмма тәйвән демократийә йолиға маңғандин кейин йәрлик тәйвәнликләрниң мустәқил болуш арзуси күчәймәктә. Шуниң билән биргә чен шүйбйән йеқинда 1947 - йили йүз бәргән 28- феврал вәқәсигә җаң кәйши җавапкар болуши керәк, дегән. Гоминдаң һөкүмити 1947 - йили 28 - феврал күни тәйвән хәлқиниң исянини қанлиқ бастурған иди.

Чен шүйбйән дөләтни бирликкә кәлтүрүш комитетиниң бикар қилинғанлиқини җакарлаштин бир күн бурун, хитай дөләт кабинтиниң тәйвән ишлар ишханиси шинхуа ахбарат агентлиқи арқилиқ баянат елан қилип, "җуңго тәрәп тәйвән мустәқиллиқигә сүкүт қилип туралмайду. Тәйвән бөлгүнчи күчлириниң тәйвәнни вәтән қойнидин бөлүп чиқип кетишигә һәргизму йол қоймайду " деди. Тәйвән ишлири ишханисиниң мәсули баянатида, чен шүйбйәнни асия - тинч окян райониниң вәзийитини җиддиләштүрүветиш билән әйиблигән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.