Chén shüybyen döletni birlikke keltürüsh komitéti we programmisini bikar qildi

Teywen prézidénti chén shüybyen düshenbe küni teywen hökümitining xitay chong quruqluqini birlikke keltürüsh niyitidin waz kechkenlikini jakarlidi. Xitayning teywen ishliri ishxanisi bolsa junggo terepning " teywen musteqilliqi" we " teywen bölgünchi küchliri" ge qet'i yol qoymaydighanliqini élan qilghan.

Prézidént chén shüybyen, düshenbe küni teywen dölet xewpsizlik komitétining yighinidin kéyin, teywenning xitay chong quruqluqigha qaritilghan döletni birlikke keltürüsh komitéti we döletni birlikke keltürüsh programmisining toxtutulghanliqini bildürdi. Emma u, teywen boghizining hazirqi halitini özgertish niyiti yoqliqini tekitligen.

Jang keyshi we uning gomindang hökümiti 1949 - yili xitay komunistlirigha meghlub bolup teywen'ge qéchip barghandin kéyin, künlerning biride xitay chong quruqluqigha qaytip kétish niyitidin waz kechmigen idi. Emma teywen démokratiye yoligha mangghandin kéyin yerlik teywenliklerning musteqil bolush arzusi kücheymekte. Shuning bilen birge chén shüybyen yéqinda 1947 - yili yüz bergen 28- féwral weqesige jang keyshi jawapkar bolushi kérek, dégen. Gomindang hökümiti 1947 - yili 28 - féwral küni teywen xelqining isyanini qanliq basturghan idi.

Chén shüybyen döletni birlikke keltürüsh komitétining bikar qilin'ghanliqini jakarlashtin bir kün burun, xitay dölet kabintining teywen ishlar ishxanisi shinxu'a axbarat agéntliqi arqiliq bayanat élan qilip, "junggo terep teywen musteqilliqige süküt qilip turalmaydu. Teywen bölgünchi küchlirining teywenni weten qoynidin bölüp chiqip kétishige hergizmu yol qoymaydu " dédi. Teywen ishliri ishxanisining mes'uli bayanatida, chén shüybyenni asiya - tinch okyan rayonining weziyitini jiddileshtürüwétish bilen eyibligen. (Erkin)