Xitay chén shüybyenning amérikini ziyaret qilishigha qarshi chiqti

Xitay tashqi ishlar ministirliqi peyshenbe küni teywen prézidénti chén shüybyenning amérikini ziyaret qilishigha qet'iy qarshi turidighanliqini bildürüsh bilen birge, amérika hökümitini chénning amérikida pa'aliyet qilishini tosashqa chaqirdi.

Xitay tashqi ishlar ministirliqining bayanatchisi chin gang, " xitay teywen rehbirining her qandaq nam yaki bahane bilen amérikida pa'aliyet qilishi'igha qet'iy qarshi turidu" dédi. U sözide yene, amérikining bir xitay prinsipida ching turup, amérika-xitay 3 birleshme bayanatigha ri'aye qilishi we teywen musteqilliqigha qarshi turush wediside turushi kéreklikini tekitlidi.

Bayanatchi chin gang xitay hökümitining teywenning chet'ellerdiki pa'aliyetlirige izchil türde bir xitay prinsipi boyiche mu'amile qilip kelgenlikini, emma xitayning teywen da'irilirining her xil bahaniler bilen xelq'arada musteqilliq heriketlirini qilishigha yol qoyalmaydighanliqini bildürdi.

Teywen prézidénti chén shüybyen bu yil 5‏-ayda shimaliy we jenubiy amérika qit'esidiki bir qanche döletke ziyaret qilishni pilanlighan bolup, u amérikidimu toxtap ötmekchi. Emma amérika hökümiti uning bu sepirige téxi héchqandaq inkas qayturmidi. (Peride)