Teywen xitayni prézidént chén shüybyenning ziyaritige buzghunchiliq qilish bilen eyiblidi

• 
  2006-05-02

Teywen hökümiti seyshenbe küni xitay da'irilirini prézidént chén shüybyenning latin amérikisi we karayip rayonidiki döletlerde élip baridighan ziyaritige buzghunchiliq qilmaqta, dep eyiblidi.

Chén shüybyen esli charshenbe küni paragway bilen kostarikada élip baridighan ziyaritini bashlimaqchi idi. U, bu döletlerge bérish sepiride amérikida toxtap ötmekchi bolghan. Lékin amérika hazirghiche chén shüybyenning ayropilani qeyerde toxtisa bolidighanliqini teywen terepke uqturmidi.

Teywen tashqi ishlar ministirliki bayanatchisi maykil lu, "bu weqe ilgiri yüz bérip baqmighan. Biz xitayning qol tiqishi arqisida ilgiri yüz bérip baqmighan qiyinchiliqqa duch kéliwatimiz," deydu.

Amérika teywenning eng muhim ittipaqdishi we qoral - yaraq bilen teminligüchisi bolup, hazirghiche amérika teywen rehberlirining amérikini resmi ziyaret qilishigha yol qoymighan bolsimu, lékin ularning amérika zéminidin ötüshige yol qoyup kelmekte idi.

Teywen metbu'atlirining xewer qilishiche, chén shüybyen nyu-yorkta toxtap ötüshni arzu qilidiken. Teywen tashqi ishlar ministiri jéymis xu'ang muxbirlargha " paragway we kostarikada élip baridighan ziyaritimiz tesirge uchrimaydu, lékin biz ziyaretning kéchiktürülüshini chetke qaqmaymiz," dédi.

Xitay tashqi ishlar ministirliki bayanatchisi chin gang ötken hepte amérikini chén shüybyen'ge yol bermeslik toghrisida agahlandurghan. Chén shüybyen 2003 - yili latin amérikisidiki teywen bilen diplomatik munasiwiti bar döletlerni ziyaret qilish sepiride nyu - york shehiride toxtighan we bu yerde kishilik hoquq mukapatini tapshuruwélish murasimigha qatnashqan idi. (Erkin)