Тәйвән хитайни президент чен шүйбйәнниң зияритигә бузғунчилиқ қилиш билән әйиблиди


2006.05.02

Тәйвән һөкүмити сәйшәнбә күни хитай даирилирини президент чен шүйбйәнниң латин америкиси вә карайип районидики дөләтләрдә елип баридиған зияритигә бузғунчилиқ қилмақта, дәп әйиблиди.

Чен шүйбйән әсли чаршәнбә күни парагвай билән костарикада елип баридиған зияритини башлимақчи иди. У, бу дөләтләргә бериш сәпиридә америкида тохтап өтмәкчи болған. Лекин америка һазирғичә чен шүйбйәнниң айропилани қәйәрдә тохтиса болидиғанлиқини тәйвән тәрәпкә уқтурмиди.

Тәйвән ташқи ишлар министирлики баянатчиси майкил лу, "бу вәқә илгири йүз берип бақмиған. Биз хитайниң қол тиқиши арқисида илгири йүз берип бақмиған қийинчилиққа дуч келиватимиз," дәйду.

Америка тәйвәнниң әң муһим иттипақдиши вә қорал - ярақ билән тәминлигүчиси болуп, һазирғичә америка тәйвән рәһбәрлириниң америкини рәсми зиярәт қилишиға йол қоймиған болсиму, лекин уларниң америка земинидин өтүшигә йол қоюп кәлмәктә иди.

Тәйвән мәтбуатлириниң хәвәр қилишичә, чен шүйбйән ню-йоркта тохтап өтүшни арзу қилидикән. Тәйвән ташқи ишлар министири җеймис хуаң мухбирларға " парагвай вә костарикада елип баридиған зияритимиз тәсиргә учримайду, лекин биз зиярәтниң кечиктүрүлүшини чәткә қақмаймиз," деди.

Хитай ташқи ишлар министирлики баянатчиси чин гаң өткән һәптә америкини чен шүйбйәнгә йол бәрмәслик тоғрисида агаһландурған. Чен шүйбйән 2003 - йили латин америкисидики тәйвән билән дипломатик мунасивити бар дөләтләрни зиярәт қилиш сәпиридә ню - йорк шәһиридә тохтиған вә бу йәрдә кишилик һоқуқ мукапатини тапшурувелиш мурасимиға қатнашқан иди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.