Хитай һөкүмити чин шүйбйәнниң америкида тохтап өтидиғанлиқиға қаттиқ наразилиқ билдүрди


2007.01.08

Хитай һөкүмити дүшәнбә күни тәйвән президенти чин шүйбйәнниң никарагуаға қилидиған сәпиридә америкида тохтап өтидиғанлиқиға қаттиқ наразилиқ билдүрди.

Хитай ташқи ишлар министирлиқи тәрипидин бу мунасивәт билән елан қилинған бир баянатда, хитай һөкүмитиниң америка билән тәйвән һөкүмәт даирилири оттурисидики һәрқандақ алақә вә мунасивәткә қатий қарши туридиғанлиқи вә бундақ бир һәрикәтниң хитай америка мунасивәтлирини бузидиғанлиқи билдүрүлгән. Баянатда шундақла чин шүйбйәнниң америка тохтап өтүштики асаслиқ мәқсити җуңгони парчилаш шуниң үчүн америка чин шүйбйәнниң һәрқандақ бир исим вә үнван билән америкиға беришиға рухсәт қилмаслиқи вә тәйвәнгә хата сигнал бәрмәслики керәк, дейилгән.

Чин шүйбйәнниң баянатчисиниң билдүрүшичә, чаршәнбә күни никарагуаниң йеңи сайланған президенти даниял ортиганиң вәзипә тапшурувилиш мурасимиға қатнишиш үчүн йолға чиққан тәйвән президенти америкиниң сан франсиско шәһиридә 17 саәт туридикән.

Америка һөкүмити өткән йили тәйвән президенти латин америкиға қилидиған сәпиридә америкиниң нюйорк яки сан франсиско шәһәрлиридә тохтап өтүш тәлипини рәт қилип, униң орниға сиясий җәһәттин әһмийәтсиз һесабланған алйсакада тохтап өтүшини тәклип қилған.

Чин шүйбйәнниң сан франсискода туруш җәрянида нимә қилидиғанлиқи кимләр билән көрүшидиғанлиқи ениқ әмәс. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.