Xitay kompartiyisi chiriklikke qarshi qarar maqullidi

Hakimiyettiki xitay kompartiyisi düshenbe küni alahide höjjet chiqirip, parixorluq we qabiliyetsizlikning xitay kompartiyisining hakimiyitige tehdid élip kélishi momkinligini bildürdi.

Chet'el axbarat agéntliqlirining xewerlirige qarighanda, 36 betlik mezkür höjjette, "xitay kompartiyisining hakimiyet yürgüzüsh iqtidarini yaxshilash- yaxshiliyalmasliq mesilisi , uning hayat- mamatliqigha munasiwetlik muhim mesile" dep körsitilgen. Xitay kompartiyisi höjjette yene, parixor kompartiye ezalirini qattiq tenqid qilip, partiye ezalirini xewp tuyghusi shekillendürüshke ündigen.

En'giliye b b s radi'o - téléwiziyisining xewiride éytilishiche, mezkür höjjet, xitay kompartiyisi rehberlirining puqralarning chiriklikke qarshi naraziliq keypiyatlirining küchiyishige egiship, kompartiyining xelqning himayisidin ayrilip qélishidin endishe qiliwatqanliqini namayen qilidu.

Gerche höjjette parixorluq qattiq tenqid qilin'ghan bolsimu, biraq bu mesilini qandaq bir terep qilish heqqidiki konkrét tedbirler tilgha élinmighan. (Arzu)