Xitaydiki hökümetke qarashliq orunlarning xiyanet qilghan sommisi 10 milyard yu'en'ge yéqinlashqan

Xitayning döletlik mupettish idarisi seyshenbe küni bir parche doklat élan qilip, pütün xitay boyiche 2004 - yili her xil shekilde yüz bergen belgilimilerge xilapliq qilish mesililiridiki iqtisadiy xiyanetning 10 milyard yu'en'ge yetkenlikini ashkarilidi.

Xitay mupettish idarisi bu doklatni seyshenbe küni xitayning 10 - nöwetlik memliketlik xelq qurultiyi da'imiy komitétining 16 - qétimliq yighinida élan qilghan. Uningda hökümet organlirida xiyanetchilik qilin'ghan pul sani 9 milyard 6 yüz milyon yu'en bolup, buning arisida dölet igiligidiki karxanilarda 1 milyard 450 milyon yu'en pulning qaqti-soqti qilin'ghanliqi körsitilgen.

Xitay mupettish idarisi doklatida yene, ötken yili pütün xitay boyiche hökümet orunliridiki xiyanetchilik qilish déloliridin 222 si bayqilip, buninggha chétilghan 762 neper hökümet xadimining oxshimighan derijide bir terep qilin'ghanliqi élan qilin'ghan.

Doklatqa asaslan'ghanda, xiyanetchilik qilish ehwali xitay hökümitining her qaysi qatlamlirida we her xil shekilde körüliwatqan bolup, bu hetta merkez organliridin tartip, taki doxturxana we su insha'ati qurulushi'ighiche bolghan sahelerde bayqalghan. (Peride)