Chiriklik xitayning iqtisadigha xewp élip kelmekte

Iqtisadiy hemkarliq we tereqqiyat teshkilati, xitayda künséri éghirlishiwatqan chiriklik ehwalining jem'iyet muqimsizliqiliqini keltürüp chiqirdighan we xitay rehberlirining qanuniy ornigha xewp élip kélidighan asasliq amil bolup qalghanliqini bildürdi.

En'giliyide chiqidighan maliye waqti gézitining xewirige qarighanda, mezkur teshkilatning xitaydiki chiriklik ehwalini bahalashqa mes'ul tetqiqatchisi janos bértok," xitayda iqtisadning tereqqi qilishi bilen chériklipmu edep ketti. Emeldarlarning chirikliki bir jem'iyet mesilisila emes, belki yene iqtisadiy mesilige aylandi, puqralarning birdek naraziliqini qozghap, béyjing hökümitining qanuniy ornigha tehdit élip keldi" dep körsetti.

Uning bildürüshiche, chiriklik mesilisi bolupmu xosusiylishishiqa yüzlen'gen dölet igilikidiki karxanilargha we qurulush sahelirige éghir ziyan élip kelmekte.

Xewerge qarighanda, yéqinqi yillardin buyan nurghun xitay emeldarliri we bankirliri zor miqdardiki pullarni élip chet'ellerge qéchip ketken. Xitay soda ministirliqining mölcherlishiche, ötkenki yigirme yil ichide chet'elge qéchip ketken parixor emeldarlarning sani töt mingdin artuq bolup, ular jem'iy 50 milyard dollar pulgha xiyanet qilghan.

Bash shtabi parizhdiki iqtisadiy hemkarliq we tereqqiyat teshkilatigha amérika, kanada, awistiraliye qatarliq 30 dölet eza bolup, ular dunyada démokratik hökümet qurush we bazar igilikini ilgiri sürüshni meqset qilidu. (Arzu)