Хитайда 11 айда 290 милярд сом қанунсиз ишлитилгән

Хитай дөләт малийини назарәт қилиш вә башқуруш комитети, 22000 һөкүмәт хадими үстидин елип барған хизмәт тәкшүрүши нәтҗисидә,хитай һөкүмәт идарилириниң өткән 11 ай мабәйнидә 290 милярд сомни қанунсиз ишләткәнликини байқиған.

Франсийә агентлиқиниң хәвәр қилишичә, хитай дөләт малийини назарәт қилиш вә тәкшүрүш комитети, қанунсиз ишлитилгән пулларниң қандақ хәҗләнгәнлики һәққидә тәпсили мәлумат бәрмигән, әмма комитет бундин бурунқи тәкшүрүшлиридә, һөкүмәт хадимлириниң, амминиң пулини кадирларға өй селиш вә өзлири мәнпәәтлиниш үчүн ишләткәнликини ашкарилиған иди. Хәвәрдә ейтилишичә, 196 һөкүмәт хадими интизам җазасииға учриған вәяки сотқа тартилған.

Хитай һөкүмити йеқинқи йиллардин буян , күнсири көпийиватқан дөләт ичидики черикликниң алдини елиш һәққидә һөкүмәт идарилирида йиллиқ тәкшүрүш елип бармақта. Дөләттики чериклик, хитайда узун йиллардин бери давамлишиватқан вә иқтисиади ислаһат һәрикити билән бирликтә күчәйгән бир кесәллик болуп, йеқинда иқтисади һәмкарлиқ вә тәрәққият тәшкилати чирикликниң хитай коммонист һөкүмитиниң енавитигә қаттиқ зәрбә берип, бу һөкүмәтниң қанунлуқ бир һакимйәт икәнлики яки әмәслики тоғрисида суал пәйда қиливатқанлиқини билдүрди.

2004 ‏-Йили хитай дөләт малийини назарәт қилиш вә башқуруш идариси тәрипидин елип берилған тәкшүрүштә, хитай мәркизи һөкүмәт органлириниң 9 милярд 60 милйон сомни орунсиз хәҗлигәнлики 5 ,14 милярд сомниң дөләт игилигидики чоң ширкәтләр тәрипидин қанунсиз ишлитилгәнлики оттуриға чиққан. (Қанат)