Xitay teptish idarisi hökümettiki chong xiyanetchilik weziyitini bayqidi
2006.06.28
Charshenbe küni xitayning iqtisadiy teptish orgini hökümet ichide keng taralghan chiriklik weziyitini pash qilip, ötken yilining ichidila merkiziy hökümet organlirining hökümet puli we bayliqini qanunsiz ishlitish sommisi 2 milyard amérika dolliridin ashqanliqini ashkarilidi.
Bu melumatlar xitayning 2006- yilliq iqtisadiy teptish doklatida körsitilgen bolup, bu yilqi xiyanetchilik ehwali ötken yildikidin nechche hesse éghir bolghan. Doklatta xiyanetchiliktin sirt yene, baj yighish xizmitining yaxshi bolmasliqi we hökümet yerlirini xalighanche sétish ehwallirimu eyiblinip, mushu seweblerdin xitay merkiziy hökümet organlirining ötken bir yil ichide jem'iy 2 milyard 200 milyon amérika dollirini yoqatqanliqi körsitilgen.
Baj yighish xizmitining yaxshi bolmasliqi téxi xitayning shangxey, jéjyang we jyangsulargha oxshash iqtisadiy tereqqiy qilghan déngiz boyi rayonlirida körülgen. Uning üstige hökümet orunlirining yerlerni shexsiy karxanilargha nahayiti töwen bahada sétip bérishimu, hökümet üchün 5 yérim milyard yüendin oshuq yoqitish peyda qilghan.
Bu doklatni xitayning iqtisadiy teptish ishxanisi mudiri li jinxu'a élan qilghan bolup, u 1999- yili tunji qétim qanun turghuzush organlirigha bu xildiki teptish doklatini sun'ghan hemde shuningdin buyan her yili dégüdek hökümet organliridiki zor xiyanetchilik ehwalini pash qilip kelgen idi.
Li jinxu'a sözide yene, xitay maliye ministirliqi we tereqqiyat-islahat komitétining xizmettiki boshangliqlirini eyiblidi hemde xitayning bu jehette islahatni ilgiri sürüp, hökümet emeldarlirining chiriklikige qarshi heriketni kücheytish kéreklikini otturigha qoydi. Nöwette xitaydiki chiriklik mesilisi xitay iqtisadigha tesir körsitiwatqan chong amil bolup qalmaqta.(Peride)
Munasiwetlik maqalilar
- Béyjing olimpik qurulushining mu'awin rehbiri xiyanetchilik sewebidin tekshürüldi
- Béyjingning mu'awin sheher bashliqi xiyanetchilik bilen eyiblendi
- Xitaydin chetke qachqan jinayetchiler 8 milyard dollargha yéqin xiyanet qildi
- Xitay bankiliridiki passip qerz miqdari xitay élan qilghandinmu köp
- Xitayda bir ministir muddetsiz qamaq jazasigha höküm qilindi