خىتاي، پوۋېلنىڭ ئىككى قىرغاق سۆھبىتىنى ئەسلىگە كەلتۈرۈش چاقىرىقىنى رەت قىلدى


2004.10.27
Share on WhatsApp
Share on WhatsApp

خىتاي ھۆكۈمىتى چارشەنبە كۈنى ئامېرىكا تاشقى ئىشلار مىنىستىرى كولىن پوۋېلنىڭ ئىككى قىرغاق سۆھبىتىنى ئەسلىگە كەلتۈرۈش چاقىرىقىنى رەت قىلدى.

ئامېرىكا بىرلەشمە ئاخبارات ئاگېنتلىقىنىڭ خەۋىرىگە قارىغاندا، خىتاي دۆلەت كابىنتى تەيۋەن ئىشلىرى ئىشخانىسىنىڭ باياناتچىسى جاڭ مىڭچىڭ، بېيجىڭنىڭ تەيۋەن بىلەن سۆھبەتنى ئەسلىگە كەلتۈرۈش ئاساسىنى كۆرۈپ يېتەلمەيدىغانلىقىنى، شۇنداقلا تەيۋەن پرېزدېنتى چېن شۈيبىيەن ئوتتۇرىغا قويۇپ كېلىۋاتقان تۈرلۈك لايىھىلەرنىڭ ھېچقانداق ئەھمىيىتى يوقلىقىنى بىلدۈردى.

كولىن پوۋېل مۇشۇ ھەپتە خىتاي رەھبەرلىرى بىلەن كۆرۈشكەندە، خىتاي ھۆكۈمىتىنى تەيۋەن بىلەن بولغان سۆھبەتنى قايتا ئەسلىگە كەلتۈرۈشكە چاقىرغان ئىدى. شۇنداقلا پوۋېلنىڭ " تەيۋەن مۇستەقىل دۆلەت ئەمەس" دېگەن سۆزى تەيۋەندە كۈچلۈك ئىنكاس پەيدا قىلدى. ھەمدە چارشەنبە كۈنى نەچچە ئونلىغان تەيۋەنلىك ئامېرىكىنىڭ تەيۋەن بوغۇزى ئىشلىرى جەمئىيىتى ئالدىدا نامايىش ئۆتكۈزدى.

تەيۋەن پرېزىدېنتى چېن شۈيبىيەنمۇ پوۋېلنىڭ بۇ سۆزلىرىگە نارازى بولۇپ، تەيۋەنگە زىيارەتكە كەلگەن جەنۇبىي كورىيەنىڭ سابىق پرېزىدېنتى كىم يوڭسەمگە، " تەيۋەن مۇقەررەركى ئۆز ئىگىلىك ھوقۇقىغا ئىگە مۇستەقىل دۆلەت، باشقا دۆلەتلەر بۇ ھەقىقەتكە تەسىر كۆرسىتەلمەيدۇ ۋە ئىنكار قىلالمايدۇ" دەپ بىلدۈردى.

ئامېرىكا ھۆكۈمىتى " بىر جۇڭگو" پىرىنسىپىنى ئېتىراپ قىلىدۇ، ئەمما تەيۋەننى قورال كۈچى بىلەن بويسۇندۇرۇشقا قارشى تۇرىدۇ. شۇنداقلا ئامېرىكا تەيۋەنگە قورال-ياراق سېتىپ بېرىدىغان ئەڭ چوڭ دۆلەت ھېسابلىنىدۇ. (پەرىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت