Kolin powéll : amérika teywen'ge bergen wediside ching turidu

Amérika tashqi ishlar ministiri kolin powéll, amérikining teywen'ge bergen wediside ching turidighanliqini bildürgen. Shundaqla u amérikining bir jonggo siyasiti hörmet qilidighanliqini tekitligen.

Kolin powéll yuqiriqi sözni yéqinda amérikini ziyaret qilghan xitay merkizi herbiy ishlar komitétining mu'awin re'isi, xitay azadliq armiyisi shtab bashliqi lyang gu'anglyé bilen köröshkende qilghan.

Amérika tashqi ishlar ministirliqining bayanatchisi richard bochér amérka tashqi ishlar ministirining sözini neqil keltürüp, amérikining teywen mesilisidiki meydani özgermidi, dep körsetti. U, amérikining meydani bir xitay siyasitini, xitay - amérika 3 qoshma axbarati we amérikining teywen munasiwet qanunidiki mes'uliyitini asas qilghanliqini ilgiri sürgen.

Lyang gu'anglyé, amérika armiyisi birleshme shtabining re'isi richard meyérssning teklipi boyiche amérikini ziyaret qildi. Lyang gu'anglyé we uning hemraliri 24 - öktebirde amérikigha kelgen. Ular amérika wirjiniye shtatining norfolk déngiz armiye bazisidiki jorji washin'gton namliq awi'amatkini ziyaret qilghan. Amérika tashqi ishlar ministiri kolin powéll yéqinda xitayni ziyaret qilghanda teywenni igilik hoquqluq musteqil dölet emes, dep körsetken. Kolin powéllning sözi teywen da'irilirini ghezeplendürgen. Kolin powéllning " amérika teywen munasiwet qanunidiki wedisige emel qilidu"digen sözliri, teywen terepni xatirjem qilish üchün éytilghan bolushi mümkin dep qaralmaqta. (Erkin)