Ху җинтав: хиянәтчилик компартийиниң тәқдирини бәлгиләйду

Хитай компартийиси баш секритари ху җинтав, дүшәнбә күни бейҗиңда башланған компартийә 17 ‏- қурултийиниң ечилиш мурасимида сөз қилип, хиянәтчилик компартийиниң һаят -маматлиқиға мунасивәтлик мәсилә, дәп көрсәтти. Ху җинтавниң қурултайдики доклати, иқтисади тәрәққият, хиянәтчилик, һәрбий ишлар, тәйвән мәсилиси вә ташқи сиясәткә мунасивәтлик көп саһәләргә четилған болуп, у доклатта өзиниң "илмий тәрәққият нәзирийиси"ни оттуриға қойди.

Көзәткүчиләр, бу ху җинтавниң мав зедуң, дең шавпиң вә җяң земинлар қатарида өз нәзирийисини оттуриға қоюп, партийә ичидә 4 ‏- әвлат рәһбәрлик нопузини тикләш нийитини ипадиләйду, дәп қаримақта. У,хиянәтчилик һәққидә тохтилип, " хиянәтчиликни қәтий җазалаш вә үнүмлүк алдини елиш кишиләр майиллиқи һәм партийиниң һаят - маматлиқи билән мунасивәтлик зор сиясий мәсилә" дәп көрсәтти. Ху җинтав, һәрбий ишлар үстидә тохталғанда бир тәрәптин, һәрбий ислаһат қәдимини тезлитишни тәкитләп, йәнә бир тәрәптин,хитайниң мәңгү муштумзор вә кеңәймичи дөләт болмайдиғанлиқини билдүрди.

Қурултайниң ечилиш мурасимида көзәткүчиләрниң диққитини қозғиған йәнә бир һадисә, пинсийидики җя земинниң ху җинтавдин кейин 2 ‏- болуп сәһнигә чиққанлиқидур. Әсли қаидидә ху җинтавдин кейин қалса сиясий бюрода 2 ‏- орундики ву баңго 2 ‏- болуп сәһнигә чиқиши керәк иди. Ху, тәйвән мәсилисидә бир җуңго сияситини тәкитлиди вә тәйвән мустәқиллиқиға қарши туридиғанлиқини әскәртип, " тәйвәндики һәр қандақ сиясий партийә пәқәт бир җуңго сияситини етирап қилсила......... Биз улар билән һәр қандақ мәсилә үстидә сөзлишишкә тәйяр " дәп көрсәтти. (Әркин)