Xitay dalay lamani amérika merkiziy axbarat idarisi bilen baghlinishi bar dep eyiblidi

Xitay tibetlerning diniy dahisi dalay lamani amérikidiki merkiziy axbarat idarisi bilen baghlinishi bar dep eyiblidi.

Roytérs agéntliqining xewer qilishiche, bu qarashlar xitayda én'glizche chiqidighan "xitay kündilik géziti" de élan qilin'ghan maqalide körsitilgen bolup, uningda dalay lamani hindistan armiyisi we amérika merkiziy axbarat idarisi bilen hemkarliship "hindistan-tibet alahide chégra etriti" ni qurghan dep körsetken.

Maqalide yene, merkiziy axbarat idarisi, dalay lama xitaydin qéchip chiqqanda sürgündiki tibetliklerdin texminen 400 ini mexsus kolorado, okinawa we gu'amdiki herbiy bazilirida chéniqturghan dep yazghan. Maqalide xelq'ara nobél tinchliq mukapatigha érishken dalay lama, népalda qoralliq armiye teshkilligen we chet'ellerde bölgünchi teshkilatlirini qurghan dep eyiblen'gen.

Dalay lamaning sürgündiki hökümitining bayanatchisi xitay kündilik gézitide élan qilin'ghan bu maqalidin epsuslan'ghanliqini ipadilep, dalay lamaning tibet mesilisini tinch yol bilen hel qilish yaxshi niyitige bundaq shek keltürüshning tolimu epsuslinarliq ehwal ikenlikini bildürdi.

Dalay lama wekili bilen xitay hökümiti otturisidiki söhbet 2002‏- yili eslige keltürülgen bolsimu, hazirghiche héchqandaq ilgirlesh hasil bolmidi. (Peride)