Хоңкоңлуқларниң толуқ демократийә тәлипи рәт болди

2007-12-31
Елхәт
Пикир
Share
Принт

Хитай хәлқ қурултийи даимий комитети шәнбә күни йәни 29 ‏- декабир күни, хоңкоңда өткүзүлидиған омуми сайламниң вақтини музакирә қилди. Музакирә нәтиҗисидә хоңкоңлуқларниң омуми сайламни 2012 ‏- йили өткүзүш тәлипи рәт болди.

Хоңкоң қануни буйичә хоңкоң район башлиқи 5 йилда бир қетим сайлиниду; 3 ‏- қетимлиқи 2012 ‏- йили өткүзүлиду. Нөвәттә хоңкоңда йолға қоюлуватқан сайлам усулида, район башлиқини хоңкоң хәлқи бивастә сайлап чиқмайду, бәлки сайлам комитети тәрипидин сайлиниду.

Сайлам комитетида 800 нәпәр әза болуп, булар, хоңкоңдики түрлүк саһәләр тәрипидин көрситилгән вәкил, буларниң һәммиси бейҗиң тәрәпдари. Хитай хоңкоңни өткүзүвалғанда, хоңкоң район башлиқини хоңкоң хәлқиниң өзи сайлап чиқидиғанлиқи йәни омуми сайлам өткүзилидиғанлиқи һәққидә вәдә бәргән, әмма омуми сайламниң вақтини тилға алмиған.

Һазир хоңкоң хәлқи хитайни әшу вәдисини әмәлийләштүрүшкә қистимақта иди. Алдинқи айда, хоңкоң район башлиқи, бейҗиңға доклат йоллап хоңкоңлуқларниң бу тәлипини йәткүзгән, хоңкоңдики демократчилар, алдинқи һәптә ачлиқ елан қилип, хоңкоң хәлқиниң омуми сайлимини 2012 ‏- йили өткүзүш тәлипиниң қәтийликини бейҗиңниң есигә салған иди.

Хитай хәлқ қурултийи даимий комитети шәнбә күнки йиғинида, хоңкоңлуқларниң мәзкур тәлипини рәт қилип; омуми сайламниң 2017 ‏- йили өткүзүлидиғанлиқини, 2012 ‏- йили пәқәт, нөвәттики сайлам усулиға бәлгилик өзгәртиш киргүзидиғанлиқини билдүрди. (Шөһрәт һошур)

Пикирләр (0)
Share
Толуқ бәт